Էդմոն Մարուքյանը ներկայացրել է «Կալանքի մեկ օրվա հաշվարկի» նախագծի առավելությունները
ԱԺ «Ելք» խմբակցության անդամ Էդմոն Մարուքյանը Facebook -ի ուղիղ եթերում խոսել է իր ներկայացրած «Կալանքի մեկ օրվա հաշվարկի նախագծի» վերաբերյալ։ Մարուքյանը նշել է, որ քանի դեռ համաներման մասին որևէ խոսք չկա և իրենք շարունակում են համաներում պահանջել, ապա սա մի մարդասիրական դրսևորում է:
Խմբակցության անդամը հայտնել է, որ ՀՀ-ում դեռ 2003 թ. ընդունված քրեական օրենսգրքով եղել է նորմ, որով նախնական կալանքի մեկ օրը հավասար է ազատազրկման և կարգապահական գումարտակում պահելու ձևով նշանակվող պատիժների մեկուկես օրվան: Հետո քրեական օրենսգիրքը փոփոխության է ենթարկվել, ուստի այս նախագծով առաջարկում են կրկին հավասարեցնել նախնական կալանքի տակ պահելու 1 օրն ազատազրկման և կարգապահական գումարտակում պահելու ձևով նշանակվող պատիժների 1.5 օրվան՝ ներկայում գործող մեկ օրվա փոխարեն։
Պատգամավորն իր ներկայացրած նախագծով առաջարկում է նաև, որ օրենքը հետադարձ ուժ ստանա մինչև 2004թ.:
«Սա լուրջ փոփոխություն կլինի քրեակատարողական համակարգի համար, դրա արդյունքում բազմաթիվ դատապարտվածներ կարող են ազատ արձակվել: Սա նախագիծ է, որը պաշտոնապես դրված է շրջանառության մեջ: Հուսով եմ` այսուհետ որևէ անմեղ անձ չի մեղադրվի և չի հայտնվի անազատության մեջ: Այս նախագիծն իր ազդեցությունը կարող է ունենալ նաև Շանթ Հարությունյանի և այլ աղմկահարույց գործերով դատապարտված անձանց վրա»,- ասել է նա:
«Ընդ որում, գաղտնիք չէ, որ ներպետական դատարանների կողմից կալանավորումը կիրառվում է որպես խափանման հիմնական միջոց՝ գրեթե ամեն անգամ բավարարելով մեղադրանքի կողմի միջնորդությունը։ Այս միտումն այժմ էլ շարունակում է մնալ ակտուալ»,- նշել էր նա:
Ավելի վաղ, խոսելով այս նախագծի մասին, պատգամավորը նշել էր, որ սրանով վերադարձ է կատարվում նախկին՝ ավելի մարդասիրական մոտեցմանը, քանի որ նախնական կալանքը ենթադրում է ավելի խիստ մեկուսացում և պահման այլ ավելի խիստ պայմաններ։ Նրա խոսքով` նախագիծը մշակելիս հաշվի է առնվել, որ քրեական գործերի քննությունը կարող է ձգվել մի քանի ամիս և ավելի, իսկ այդ ողջ ընթացքում անձը կարող է գտնվել նախնական կալանքի տակ։