Մենք նախկին իշխանությանը փնովելով առաջ չենք գնալու. Հայկ Մարության

«Իմ քայլը» դաշինքի քաղաքապետի թեկնածու Հայկ Մարությանը էրեբունի համայնքում իր ելույթում անդրադարձավ աղբահանության հարցին:

«Մենք նախկին իշխանությանը փնովելով առաջ չենք գնալու, մենք մեր գործն ենք անում, բայց սա, իրոք, նախորդ իշխանության բացթողումն է, քանի որ մեկ օպերատոր կա և նրա անունը դուք գիտեք՝ «Սանիտեք»: Այսօր այս օպերատորը փաստացի չի կարողանում կատարել աշխատանքը. դրա պատճառը մենաշնորհն է»,-ասաց նա և նշեց, որ դիտարկելու են երկրորդ օպերատորի մուտքը: Նա նաև կարևորեց քաղաքացիների կողմից քաղաքը մաքուր պահելը:

Հայկ Մարությանը անդրադարձավ համատիրություններին և նշեց, որ դրանց ձևավորումը պետք է սկսել զրոյից:

«Ոչ մեկ չգիտի՝ այդ փողերը ոնց են լինում, ինչ են լինում»,-ասաց նա:

Անդրադառնալով, մասնավորապես, վերելակների խնդրին, նա նշեց, որ վերելակները պատկանում են համատիրություններին և քաղաքապետարանը այդտեղ գործառույթ չունի, բայց նաև հասկանալով, որ ժողովուրդը չի կարող այդ գումարը հավաքել որ լուծի այդ խնդիրը, քաղաքապետարանը պետք է վերանորոգի և հարկ եղած դեպքում փոխի դրանք:

Մանկապարտեզների մասին խոսելով՝ նա երեք խնդիր առանձացրեց՝ շենքային ու բակային պայմաններ, մանկապարտեզների թիվն ու սնունդը և այդ ուղղությամբ ներկայացրեց իրենց լուծումները:

Հայկ Մարությանը անդրադրաձավ պոլկլինիկաներին՝ ասելով, որ այդ հարցին պետք է կոմպլեքս մոտենալ, խոսեց դպրոցներին, բնապահպանությանը, կանաչապատմանը, ոռոգման ջրի հարցերի մասին և ասաց, որ նախատեսում են 5 տարում 500 000 ծառ տնկել, և դա բոլոր երևանցիների գործառույթն է լինելու: Նա նաև խոսեց զբոսաշրջիկների համար Երևանը գրավիչ դարձնելու ծրագրերի մասին:

«Սիրելի՛ երևանցիներ, ես չեմ էլ կասկածում, որ բոլոր քաղաքական ուժերի մոտ հիանալի ծրագիր է գրված, բոլորն էլ գրում են, խոսք են տալիս, բայց այստեղ հարցը ծրագիրը չէ, այլ կա միայն մեկ հարց՝ թե որ քաղաքական ուժն է պատրաստ, ունի քաղաքական կամքը, որ իրականացնի այն բոլոր ծրագրերը, որոնք ինքը խոսք է տալիս։

Այդ ուժը «Իմ քայլը» դաշինքն է»,-ասաց նա: