Ռուբեն Վարդանյանը շատ պարզ բան է ասում. Կոռուպցիայի դեմ պայքարը բավարար չէ. Խոսրով Հարությունյան (տեսանյութ)
Ռուբեն Վարդանյանը շատ պարզ բան է ասում, երբ նշում է, որ բիզնեսին թվեր են պետք։ Այս մասին այսօր՝ սեպտեմբերի 10-ին լրագրողների հետ զրույցում նշեց ՀՀԿ պատգամավոր Խոսրով Հարությունյանը։
«Բիզնեսը իր լեզուն ունի, նրանց ասել՝եկեք, շատ լավ կլինի, դա բիզնեսին բավարար չէ, նրանք թվեր են սիրում»,–նշեց Խոսրով Հարությունյանը։
Նա շեշտեց՝ պետք է պայքարել կոռուպցիայի դեմ, դա շատ օգտակար է, բայց ոչ բավարար. «Ներդրողը ընդամենը մի բան է հաշվում՝ իր ռիսկերն է գնահատում եւ տեսնում է՝ ներդրումը շահութաբե՞ր է, թե՞ ոչ։ Եթե շահութաբեր չի, չի գա։ Հետեւաբար ներդրողին դա պետք է ասել, որքանով է ներդրումը այդ երկրում շահութաբեր։ Ի դեպ, երեկ Ռուբեն Վարդանյանը նաեւ հանրապետական վարչապետներին պրետենզիաներ ներկայացրեց, սա նշանակում է որ մենք բոլորս ներդրողի հետ աշխատելու փորձառություն չունենք»,–նշեց նա՝ ընդունելով որ դրանում կա նաեւ ՀՀԿ–ի սխալը, ուստի նախկին ոճով շարունակել չի կարելի։
Նա նկատեց՝ մեր ազգային տնտեսության կոնցեպտը կարող է իրականացվել միայն օտարերկրյա պոտենցիալ ներդրողների միջոցով. «Ցավոք մեր հայրենական կապիտալը արտաքին շուկաներում մրցունակ արտադրանք արտահանելու կարողություն դեռեւս չունի։ Այսպիսի պարագայում ցանկացած ներդրողի նկատմամբ մեր վերաբերմունքը պետք է շատ շրջահայաց լինի»։
Պատգամավորը շեշտեց ե՛ւ «Լիդիան Արմենիայի», ե՛ւ «Վեոլա ջրի» հետ խնդիրները լուծելի են, պետք է բանակցել. «Ազգաբնակչության մտահոգությունն այն մասին, որ Ամուլսարի գործունեության արդյունքում կարող է մեզ մոտ էկոլոգիական սպառնալիք առաջանալ եւ եթե այդ մտահոգություններն 1 տոկոս են, կարելի էր նստել եւ բանակցել։ Մաքրման կայանները կամ վտանգը չեզոքացնելու համար ի՞նչ հավելյալ ներդրումներ են անհրաժեշտ։ Կառավարությունը կարող էր հավելյալ արտոնություններ տրամադրել այդ ներդրումների համար։ Նույնը «Վեոլա ջրի» հետ կապված, պայմանագրում եթե կան այնպիսի կետեր, որոնք անհրաժեշտ է վերաբանակցել, եկեք վերաբանակցենք։ Միանգամից կասկածել, որ նրանք հանցավոր պայամանավորվածության են եկել, չի կարելի»,–նշեց նա։
Պատգամավորը սակայն բավարար չհամարեց այն հանգամանքը, որ քրեական գործ է հարուցվել «Վեոլա ջրի» դեմ. «Կապրենք կտեսնենք, չէ որ կա նաև միջազգային արբիտր։ Մենք երաշխավորված չենք, որ տանուլ չենք տալու միջազգային արբիտրաժում»,–հավելեց նա։
Հարությունյանը, անդրադառնալով հայ–ռուսական հարաբերություններին, նշեց որ ինքը շատ ուրախ կլինի եւ պատրաստ է ամեն ինչ անել որ հայ–ռուսական անամպ հարաբերությունները պահպանվեն։
Իսկ գազի գնի առնչությամբ նա կարծիք հայտնեց, որ եթե գազի գնի բարձրացում չլինի, արդեն ձեռքբերում կարելի է համարել։
Տեսանյութ՝