Աժ-ն ԿԲ խորհրդի անդամի համար քննարկում է Մարտին Գալստյանի թեկնածությունը
ԱԺ նախագահ Արա Բաբլոյանն այսօր նիստի ժամանակ հայտարարեց, որ այս շաբաթ խորհրդարանն ունի տարբեր պետական մարմինների 6 պաշտոնների ընտրություն, որոնց համար պետք է քվեարկել:
Արա Բաբլոյանի առաջարկով՝ ԱԺ-ն սկսեց քննարկել ԿԲ խորհրդի անդամի առաջադրված Մարտին Գալստյանի թեկնածությունը:
ԱԺ ֆինանսավարկային և վարկային մշտական հանձնաժողովի նախագահ Գագիկ Մինասյանը, ներկայացնելով թեկնածուին, հայտարարեց, որ Մարտին Գալստյանը բավական լուրջ աշխատանքային ճանապարհ է անցել, Դիլիջանի միջազգային դպրոցի առաջին տնօրենն է, այդ ընթացքում մեծ հաջողություններ է արձանագրել և կարողացել այն դարձնել հայկական բրենդներից մեկը:
ԿԲ խորհրդի անդամի թեկնածու Մարտին Գալստյանը ելույթում նշեց իր տեսլականը ԿԲ-ում:
Ըստ թեկնածուի՝ ազգային բանկերը պետական կառավարման համակարգի կարևորագույն ինստիտուտներից են, որոնք կայունություն են ապահովում: Ներկայացնելով իր կրթական և աշխատանքային փորձը՝ Մարտին Գալստյանը երաշխավորեց, որ ԿԲ խորհրդի կազմում ներգրավվելու դեպքում, ինքը դրանք կներդնի նոր աշխատանքում: Այդ պաշտոնում արդյունավետ աշխատելու համար պահանջվում է գիտելիք, հմտություն և փորձ, ասաց թեկնածուն՝ նշելով, որ ունի բավարար գիտելիք ու փորձ:
ԱԺ «Ելք» խմբակցության անդամ Հովիկ Աղազարյանը հարց ուղղեց վարկային քաղաքականության, վարկերի բարձր տոկոսադրույքների, ինչպես նաև ֆինանսական միջնորդ կազմակերպությունների մասին:
ԿԲ խորհրդի անդամի թեկնածուն պատասխանեց, որ բանկերը շահույթ ստանալու հետաքրքրություն ունեցող կազմակերպություններ են, և դրա շնորհիվ վերջին տարիներին մեր երկրում վարկերի տոկոսադրույքներն իջնում են: Դա բիզնեսի օրենք է: Ինչ վերաբերում է միջնորդ կազմակերպությունների հարցին, ապա դրանք լիցենզավորվում են ԿԲ-ի կողմից և անցնում են հատուկ ընթացակարգ, իսկ եթե կան օրինախախտներ, ապա դա արդեն իրավապահ մարմինների խնդիրն է:
ԱԺ «Ծառուկյան» խմբակցության անդամ Տիգրան Ուրիխանյանը հարցրեց, թե չկա՞ արդյոք հնարավորություն, որպեսզի նվազեցվեն վարկերի տոկոսադրույքները, միաժամանակ, ի՞նչ կարելի է անել այն վարկառուների հետ, որոնք ուշացումներ ունեն վարկերի մարման առումով կամ չեն կարողանում մարել դրանք:
Պատասխանում Մարտին Գալստյանը տեղեկացրեց, որ ԿԲ-ի հիմնական գործառույթն այն է, որ Հայաստանում լինի գների ու ֆինանսական կայունություն, սակայն մարդիկ դա գիտակցում են, երբ կայունությունը խաթարվում է: Անդրադառնալով վարկունակության խնդրին՝ թեկնածուն նշեց, որ կառավարությունը պարբերաբար միջոցներ է ստեղծում՝ խնդիրներ ունեցող վարկառուներին աջակցելու համար:
Որոշվեց, որ ԿԲ խորհրդի անդամի շուրջ քվեարկությունը տեղի կունենա սեպտեմբերի 11-ին՝ ժամը 11-ին: