Արգենտինայում վերսկսվել են մոտ մեկ տարի առաջ անհետացած Սան-Խուան սուզանավի որոնումները

Անցյալ տարի անհետացած Արգենտինայի ռազմածովային ուժերին պատկանող Սան-Խուան սուզանավի որոնումների գոտի է մեկնել Seabed Constructor նորվեգական նավը: Այս մասին հաղորդում է Корреспондент-ը՝ հղում անելով Արգենտինայի պաշտպանության նախարարությանը:

Հաղորդվում է, որ նավի որոնման աշխատանքներին ներգրավվել են տարատեսակ տեխնոլոգիաներ, այդ թվում և ինքնավար ստորջրյա սարքավորումներ: Որոնումների տարածքի մակերեսը կազմում է 3200 քառ. կմ:

Արգենտինայի իշխանությունները մեծ հույսեր են կապում այս որոնողական գործողությունների հետ:

Սուզանավը, որում գտնվել են անձնակազմի 44 անդամ, անհետացել է 2017-ի նոյեմբերի 15-ին Մար դել Պլատայի ռազմաբազայից շարժվելուց հետո: Նավն այդպես էլ չի հայտնաբերվել: Հետաքննության տվյալներով՝ սուզանավում հզոր պայթյուն է որոտացել: 2017-ի դեկտեմբերին որոնումները դադարեցվել էին: