Կարաոկեների, հեստապարի ակումբների, սաունաների սահմանափակումների հարցը կրկին քննարկվել է ԱԺ-ում

Երկրորդ ընթերցմամբ ՀՀ Ազգային ժողովի տարածքային կառավարման հարցերի հանձնաժողովում քննարկվել է կարաոկեների, գիշերային ու հեստապարի (մերկապար) ակումբների, սաունաների սահմանափակման հարցը։ Օրենքի նախագծով այս հիմնարկները կարող են գործել միայն հատուկ թույլտվությամբ, և կարգի խախտման դեպքում պատիժը խստացվում է։

«Ելք»-ի պատգամավոր Լենա Նազարյանի հարցին, թե ինչ սկզբունքով են ընտրվել հենց այս ժամանցի վայրերի գործունեությունը սահմանափակելու նորմերը, նախագիծը ներկայացնող տնտեսական զարգացման փոխնախարարը պատասխանեց, որ այս հիմնարկները նույն խմբին դասելու պատճառներից մեկը բնակչության նույնատիպ բողոքներն են դրանց վերաբերյալ։

«Հեստապարային ակումբները, բաղնիք-սաունա-շոգեբաղնիքն ընտրվել են այն նկատառումից ելնելով, որ դրանք, ըստ էության, վերաբերում են բարոյահոգեբանական կողմին՝ բազմաբնակարան շենքերի տակ գործունեություն ծավալվող այդպիսի գործունեությանը։ Առաջինը հաշվի է առնվել բարոյահոգեբանական մթնոլորտը և հիմնականում համայնքի կողմից դժգոհությունները, որոնք վերաբերում էին նմանատիպ ծառայություններին»,– նշեց փոխնախարարը

Հանձնաժողովի աշխատանքը նախագահող Արայիկ Հովհաննիսյանը (ՀՀԿ խմբակցություն) նշեց, որ թեև օրենքի ընդունման դեպքում այն գործելու որոշակի ժամկետից հետո, սակայն իրենք պետք է աշխատեն տեղեկացման ուղղությամբ, որպեսզի նմանատիպ հիմնարկների սեփականատերերն ու նաև բնակչությունը տեղյակ լինեն նոր կարգերի մասին։

Հանձնաժողովը միաձայն կողմ քվեարկեց օրենքի նախագծին հավանություն տալուն, ինչից հետո այն կներկայացվի Ազգային ժողովի լիագումար նիստի քննարկմանը։