Դատախազությունն անցկացնում է հակակոռուպցիոն թեմատիկայով պաստառների և տեսանյութերի միջազգային երիտասարդական մրցույթ
Հայաստանի գլխավոր դատախազությունը հայտարարել է «Միասին ընդդեմ կոռուպցիայի» թեմայով սոցիալական հակակոռուպցիոն գովազդի երիտասարդական մրցույթ:
Վերջինս ունի միջազգային ընդգրկում, անցկացվում է ԱՊՀ Կոռուպցիայի հակազդման միջպետական խորհրդի գործունեության շրջանակում, որտեղ ՀՀ դատախազությունը, Ռուսաստանի Դաշնության, Բելառուսի, Ղրղզստանի գլխավոր դատախազությունների, Ղազախստանի պետական ծառայության և կոռուպցիայի հակազդման գործակալության և Տաջիկստանի պետական ֆինանսական վերահսկողության և կոռուպցիայի դեմ պայքարի գործակալության հետ միասին հանդես է գալիս որպես համակազմակերպիչ:
Մրցույթի շրջանակներում 14-ից մինչև 35 տարեկան բոլոր ցանկացողները, այդ թվում՝ առանձին հեղինակներից բացի նաև ստեղծագործական խմբեր, իրավաբանական անձինք, կարող են որպես հակակոռուպցիոն սոցիալական գովազդ, «Միասին ընդդեմ կոռուպցիայի» թեմայով պատրաստել պաստառներ և տեսանյութեր և մինչև 2018 թվականի հոկտեմբերի 19-ը ուղարկել www.anticorruption.life-ի պաշտոնական կայքի կարգավորումներով:
Մրցույթին պայմաններին կարելի է ծանոթանալ ՀՀ գլխավոր դատախազության պաշտոնական կայքում:
Մրցույթն անցկացվում է երկու անվանակարգերում՝ լավագույն պաստառ և լավագույն տեսահոլովակ, թեև կազմակերպիչները կարող են նաև սահմանել լրացուցիչ անվանակարգեր:
Մրցույթը բաղկացած է լինելու երկու փուլից՝ կիսաեզրափակիչ և եզրափակից: Առաջին փուլում ազգային ժյուրին հոկտեմբերի 19-ից մինչև նոյեմբերի 10-ն ընկած ժամանակահատվածում հայաստանյան մասնակիցների կողմից ներկայացված աշխատանքներից կընտրի լավագույն երեքը՝ յուրաքանչյուր անվանակարգում, որոնց հեղինակը կարժանանա խրախուսական մրցանակների:
Այնուհետև մրցանակակիր աշխատանքները կներկայացվեն միջազգային ժյուրիին՝ կազմված Հայաստանի, Ռուսաստանի Դաշնության, Բելառուսի, Ղազախստանի, Ղրղզստանի և Տաջիկստանի ներկայացուցիչներից: Վերջինս էլ մինչև դեկտեմբեր կամփոփի նշված բոլոր երկրներից ներկայացված աշխատանքներից լավագույնների ընտրության վերջնական արդյունքները, և դեկտեմբերի 9-ին՝ կոռուպցիայի դեմ պայքարի միջազգային օրը, Մոսկվայում կանցկացվի հաղթողների և մրցանակաբաշխության հանդիսավոր արարողությունը: