Արա Զոհրաբյանը մտահոգ է Ամուլսարի ծրագրի խնդրով

Փաստաբանների պալատի նախագահ Արա Զոհրաբյանը ֆեյսբուքյան իր էջում գրում է.

«Մտահոգիչ հարցեր Ամուլսարի ծրագրի վերաբերյալ Ամուլսարի ոսկու հանքավայրը Հայաստանում ոսկու խոշոր հանքերից միակն է, որը գտնվում է՝ – Հայաստանի կենտրոնական հատվածում (մյուս խոշոր հանքավայրերը գտնվում են սահմանամերձ տարածքներում), – Հայաստանի երկու խոշոր գետերի՝ Արփա և Որոտան գետերի, ակունքային գոտում (Արփա-Սևան թունելի միջոցով ջուրը տեղափոխվում է նաև Սևանա լիճ), – Հայաստանի կարևորագույն հիդրոէներգետիկ կառույցներից մեկի՝ Որոտանի հիդրոէլեկտրակայանների համակարգի մասը կազմող Սպանդարյան-Կեչուտ ջրատար թունելի վրա:

Յուրաքանչյուր իրազեկ և գիտակից քաղաքացու կհետաքրքրի այն հարցը, թե Ամուլսարի հանքարդյունահանման ծրագրի իրագործումը կարող է արդյո՞ք բացասական և անդառնալի հետևանքներ առաջացնել: Կարող է արդյո՞ք, մեր անտարբերության հետևանքով տուժեն մեր սերունդները: Այս առումով, ողջունելի է իրականությունը պարզելուն ուղղված գործադիր իշխանության նախաձեռնությունը:

Կարծում եմ, պետք է պարզել՝ – «Լիդիան Արմենիա» ՓԲ ընկերությանը Ամուլսարի մասով հանքարդյունահանման թույլտվություն տրամադրելու գործընթացում օրինականության պահպանման (այդ թվում՝ կոռուպցիոն ազդեցությունների բացակայության) հարցը. – Ամուլսարի ոսկեբեր քվարցիտների հանքավայրի շահագործման արդյունքում Հայաստանի ազգային հարստություն համարվող Ջերմուկի հանքային ջրերի վրա ազդեցություն ունենալու հարցը. – Արփա և Որոտան գետերի (արդյունքում նաև Սևանա լճի) վրա ազդեցություն ունենալու հարցը. – Սպանդարյան-Կեչուտ ջրատար թունելի՝ և՛ որպես հիդրոտեխնիկական կառույցի և՛ որպես ջրատարի, վրա ազդեցություն ունենալու հարցը. – հանքավայրի փոշու տարածման հարցը, մասնավորապես փոշու տարածման հնարավոր հեռավորությունը և դրա ազդեցությունը մարդու և էկոհամակարգի վրա:

Ձևավորված փաստաբանների խումբը դեռ կատարում է իր ուսումնասիրությունը, որի արդյունքները կհրապարակվեն»: