Արագ արձագանքման համարներին կատարվող կանչերի դեպքում կներդրվի տեղորոշման համակարգ. Հակոբ Արշակյան

Ազգային ժողովի տնտեսական հարցերի մշտական հանձնաժողովի սեպտեմբերի 5-ի նիստում քննարկվման էր դրվել «Էլեկտրոնային հաղորդակցության մասին» Հայաստանի Հանրապետության օրենքում լրացում և փոփոխություններ կատարելու մասին» Հայաստանի Հանրապետության օրենքի նախագիծը:

Ներկայացված նախագծում նշվում է, որ ՀՀ ԱԻՆ` 2011 թվականից գործող «911» ծառայությունը, որն իրականացնում է տարաբնույթ ահազանգերի սպասարկում, ահազանգողներին ցուցաբերում բժշկական և հոգեբանական խորհրդատվություն ու աջակցություն, կազմակերպում ստեղծված իրավիճակին համարժեք արձագանքում՝ ներգրավելով համապատասխան ուժեր ու միջոցներ, գործունեության տարիներին սպասարկել է 6 մլն-ից ավելի զանգ, և այս ցուցանիշն ունի աճի միտում:

Զանգերի գերակշիռ մեծամասնությունը կրում է կենցաղային բնույթ, իսկ արտակարգ դեպքերի 98%-ից ավելին խնդրահարույց չէ, սակայն գրանցվում են նաև այնպիսիք, երբ ահազանգողն օբյեկտիվ կամ սուբյեկտիվ պատճառներով չի կարողանում ոչ միայն ճշգրիտ, այլև մոտավորապես տրամադրել դեպքի վայրի հասցեն, այն պարագայում, երբ անհապաղ օգնության կարիք են զգում մեր քաղաքացիները, ակնկալվում է տարբեր օպերատիվ ծառայություների արձագանքում: Նման իրավիճակներում զգալի ուշանում է արձագանքումն ու անհետաձգելի օգնության ցուցաբերումը, առաջանում է լրացուցիչ ուժեր ներգրավելու անհրաժեշտություն, մինչդեռ իրավիճակն էապես փոխվում է, երբ «911» օպերատորը հնարավորություն է ունենում տեղորոշել ահազանգողի գտնվելու վայրը:

Նախագծի զեկուցող, ՀՀ տրանսպորտի, կապի և տեղեկատվական տեխնոլոգիաների փոխնախարար Հակոբ Արշակյանը նշեց, որ նախատեսվում է «112», «911», ոստիկանության «1-02», շտապօգնության «1-03» համարներին կատարվող կանչերի դեպքում ներդնել տեղորոշման համակարգ, օպերատորին կամ ծառայություն մատուցողին իրավունք վերապահել բացահայտել հաճախորդի կողմից օգտագործվող ծառայության վայրի վերաբերյալ տեղեկությունները, հաճախորդի տեղորոշումն ու անձնական տվյալները:

Նա նշեց, որ բոլոր մեքենաները համալրված են լինելու սարքերով, որոնք, անկախ ամեն ինչից, կապ են ունենալու և վթարի պահին տեղի մասին ինֆորմացիա են ուղարկելու: Նշված սարքերի տեղադրումը մեքենաներին ներկայացվող պարտադիր պահանջ է լինելու: