Անձինք, ովքեր գործունեություն պետք է ծավալեն ազատ գոտում, մեծ հաշվով պիտի ունենան բնակատեղի. Արծվիկ Մինասյան

Տնտեսական զարգացման և ներդրումների նախարար Արծվիկ Մինասյանը սեպտեմբերի 5-ին ԱԺ տնտեսական հանձնաժողովի նիստում ներկայացրեց «Ազատ տնտեսական գոտիների մասին» օրենքի նախագիծը, նշեց, որ այն անհրաժեշտ է, որպեսզի արդեն իսկ կիրառվող օրենքի բացերը, թերությունները վերացվեն, հիմնական թյուրըմբռնումները՝ հստակեցվեն: Մինասյանի խոսքով` ԵԱՏՄ ազատ, հատուկ տնտեսական գոտիների և մաքսային միության դրույթներ կան, որոնք պետք է իրացվեն մեր օրենսդրության մեջ, որ առավել հստակ ու կանոնակարգված լինեն:

ԱԺ պատգամավոր Միքայել Մելքումյանը հիշեցրեց, որ սահմանից 160 կմ հեռու է գտնվում Թավրիզ քաղաքը, պետք է նկատի ունենալ, որ այն մոտ 5 մլն-անոց գոտի է, և արագընթաց մայրուղի է կառուցվում մինչև սահման:

«Ըստ մեր դիտարկումների` մեծ քանակի մարդիկ ուզում են գալ, Մեղրիում ժամանակ անցկացնել, նաև ազատ գոտում: Մեղրին չունի հյուրանոցներ, ակումբներ, անհրաժեշտ ենթակառուցվածքներ չկան Մեղրիում ու Քաջարանում: Ղափանը հեռու է, այնտեղ չեն գնում: Մենք կարող ենք Հայաստանի բնակչությունից շատ օգտագործել Թավրիզի բնակչության պահանջարկի ձևավորման վրա ազդող բաղադրիչները», – ասաց նա` կրկնելով, որ Մեղրիում ժամանակ անցկացնելու կամ գործունեություն ծավալելու համար անհրաժեշտ տարրական պայմաններ գոյություն չունեն:

Մելքումյանը հիշեցրեց, որ օրենքով սահմանված են նաև արդյունաբերական գոտիները, և 2015-ի հունվարից հնգամյա ծրագիր ունենալու պայման կար, որ չկա, որպեսզի առնվազն մեկ արդյունաբերական գոտի ձևավորեն տարբեր մարզերում: Պատգամավորն ընդգծեց, որ այլ երկրներում այդ փորձը լավ կիրառվում է, հետաքրքրվեց` ի՞նչ հեռանկար կա այս հարցում:

Մինասյանը համաձայնեց, որ Մեղրիում հյուրանոցների, հանգստյան գոտիների, նաև որոշակի արտադրական ենթակառուցվածքների անհրաժեշտություն կա:

«Այս հատվածի` ազատ գոտի հայտարարելը միտում ունի, որ որպես սահմանակից հատված կարողանանք իրանական պոտենցիալն իրացնել, ստեղծել անհրաժեշտ բազա, որ այս ենթակառուցվածքները նաև մասնավոր բիզնեսի մասնակցությամբ խթանենք: Դրա համար կարևոր է, որ լավ մեկնարկ տանք, որ հետագա ընդլայնման շրջանակներում նաև նպաստենք, որ որոշակի ռեժիմի պայմաններում այս ներդրումները կատարվեն»,- ասաց նա:

Նախարարի խոսքով` նշված հատվածը պետք է հանգստավայրի վերածվի, իսկ անձինք, ովքեր գործունեություն պետք է ծավալեն ազատ գոտում, մեծ հաշվով պիտի ունենան բնակատեղի: Նա ասաց, որ շեշտը Թավրիզի վրա չի դնում, այլ նկատի ունի ամբողջ իրանական շուկան, հատկապես հաշվի առնելով, որ ազատ տնտեսական գոտին իրանական կողմից էլ է մոտ, և այստեղ հնարավորություն կա երկու գոտիների համագործակցության, մանավանդ որ կնքված համաձայնագրեր կան:

Անդրադառնալով արդյունաբերական գոտիների ստեղծման հարցին` Մինասյանը նշեց, որ սա կառավարությունում քննարկման առարկա դարձած հարցերից մեկն է: Նա հայտնեց, որ վարչապետի մոտ պարբերաբար`շաբաթը մեկ կամ երկու անգամ, հարկային փոփոխությունների հարցն է քննարկվում, չափազանց թեժ քննարկումներ են լինում, դիտարկում են խորհրդարանից եկած նախաձեռնությունները: Նախարարն ասաց, որ իրենք մարզերում ու Երևանում իրականացրել են շուրջ 16 հանրային լայն հանդիպումներ, որին մասնակցել են փոքր և միջին բիզնեսի, նաև խոշոր բիզնեսի 500 ներկայացուցիչներ: Նրա խոսքով` այս հանդիպումների նպատակն է փոփոխությունները դարձնել մասնակցային, ներառական, լսել բիզնեսի մտահոգությունները, որոնցից մեկն էլ արդյունաբերական գոտու իրացմանն է վերաբերում:

Այս հարցի լուծումներից մեկն, ըստ նախարարի, այն է, որ արդյունաբերական գոտին հայտարարվի կառավարության որոշմամբ կամ անպայման որևէ գոտու մասին օրենք ընդունվի՝ իր առանձնահատուկ ռեժիմներով: