Գյուղնախարարն արմավիրցի խաղողագործներին խոստացավ տեղ հասցնել նրանց մտահոգությունները
Գյուղատնտեսության նախարար Արթուր Խաչատրյանը Արմավիրում սեպտեմբերի 5-ին հանդիպեց խաղողագործների հետ: Վերջիններս նախարարին էին դիմում «մեր աշխատանքը տվեք մեզ» պահանջով: Նախարարը խոստացավ, որ այս հանդիպումից հետո հիմնական խաղող մթերողների հետ ևս մեկ անգամ կխոսեն, որովհետև նրանք հասկանում են` վաղը, եթե խաղողագործներն այգիները հանեն, թափեն, առաջին տուժողը հենց իրենք են լինելու:
«Իրանց կոնյակը թանկանում է, մեր խաղողը` էժանանում»,- ասաց խաղողագործներից մեկը:
Նախարարի մոտ մտահոգություն հայտնեցին նաև կապված դրսից բերվող սպիրտի հետ: Խաչատրյանը ասաց, որ դրսից բերված սպիրտը մտահոգիչ է, օրենքի փոփոխություն արեցին, այն հունվարի 4-ից է մտնելու, սակայն իր ազդեցվությունը կթողնի: Նախարարն անդրադարձավ նաև կարկուտից տուժածներին աջակցությանը, նշեց, որ վերջին ճշգրտումներն են անում, ժամկետ բաց չի թողնվել, և այս տարի ավելի շուտ կլինի աջակցությունը, քան անցյալ տարի: Նրա խոսքով`քննարկվում է մոտեցում, որ մարդիկ կորուստ են ունեցել կանխիկով, կանխիկով էլ փոխհատուցեն:
«Ինչ վերաբերում է պահանջին` վերջնական գինն ասա, ես չեմ ասողը, որ ասեմ` գնա, 180 դրամով առ: Ես լսեցի ձեր մտահոգությունները, կքննարկենք վերանայման հնարավորությունները, գոնե մեր կողմից կլինի այդ խնդիրը»,- նշեց նա:
Նախարարի խոսքին արձագանքելով` գյուղացիներից մեկը նշեց, որ իրենք չեն ասում` 500 դրամով խաղող մթերեն, պարզապես խնդրում են փոխանցել, որ ազնիվ չեն եղել խաղողագործների հետ, պահանջեն խաղողի մթերման ազնիվ գին:
«Պետության համար կարևորն այն է, որ մեր ազգային հարստությունը չփոշիանա: Ես միշտ ասել եմ` գյուղատնտեսությունը սովորական բիզնես չէ, այսինքն` եթե մեկը ժամացույց է արտադրում, չի վաճառվում, կգնա, այլ բանով կզբաղվի, բայց եթե մարդ գյուղատնտեսությամբ է զբաղվում, այն իր համար եկամտաբեր չէ, նա հողը թողնում, գնում է, երկրից է գնում, այսինքն` դա երկիրը պահելու, տարածքում պահելու խնդիր է, հետևաբար, կոմերցիոն, առևտրական հարաբերություններն այստեղ կիրառելի չեն»,- ասաց նախարարը:
Գյուղնախարարի հետ հանդիպման եկած խաղողագործ մի կին էլ դժգոհեց, թե ինքը խաղողը տարել է մթերման, սակայն չեն ընդունել, ինչին նախարարն արձագանքեց, որ մթերումը սկսվելու է միայն օրեր անց:
«Ամսի 6-ից ո՞նց ես տարել, եթե ամսի 11-ից են էդ մարդիկ մթերում, մայրի՛կ ջան: Չես տարել, եթե տանես, խնդիր լինի, կասես»,- ասաց նա:
Խաչատրյանը, դիմելով ներկաներին, ընդգծեց` քաջ գիտակցում է, որ իրենից ակնկալում են կոնկրետ գին, ժամանակ, քանակ նշել, սակայն ինքը դեռ չի կարող ոչինչ ասել: Նախարարը խոստացավ կրկին խոսել խաղող մթերողների հետ, նրանց փոխանցել այդտեղ ձևավորված կարծիքը:
«Ժամանակի հետ կապված` լավ հասկանում եմ` խաղողը հասունացել է, շաքարայնության մակարդակը բարձր է: Այսօր առավոտյան խոսել եմ նաև մեր վարչապետի հետ, այդ քննարկումը կա, վերադառնալու եմ, խոսեմ, հասկանամ, փոխանցեմ ձեր մտահոգությունները»,- նշեց Խաչատրյանը: