Ի՞նչ է Ասադը 2010 թվականին գրել Օբամային ուղղված նամակում
Սիրիայի նախագահ Բաշար ալ Ասադը 2010 թվականին ԱՄՆ այն ժամանակվա նախագահ Բարաք Օբամային գաղտնի ուղերձ է հղել՝ առաջարկելով վերականգնել Իսրայելի հետ խաղաղ բանակցությունները։ Այդ մասին իր նոր գրքում գրել է ԱՄՆ նախկին պետքարտուղար Ջոն Քերին, փոխանցում է «ՌԻԱ Նովոստի» գործակալությունը։
Սիրիան փաստացի պատերազմական վիճակում է գտնվում Իսրայելի հետ՝ Գոլանի բարձունքների պատճառով։
Օրերս լույս տեսած Every Day Is Extra անվանումով Քերիի հուշագրություններին ծանոթացել է իսրայելական «Հաարեց» թերթը։
Դեռ մինչ սիրիական ճգնաժամի սկսվելը, Քերին, լինելով Սենատի միջազգային հարցերով հանձնաժողովի ղեկավարը, այցելել է Դամասկոս և հանդիպումներ ունեցել Սիրիայի նախագահի հետ։ Նա նշել է, որ այդ ժամանակ «Ասադը դեռ հետաքրքրված էր Իսրայելի հետ որոշակի գործարքով»։
«Ասադը հարցրեց ինձ՝ ի՞նչ կպահանջվի խաղաղ բանակցությունների մեկնարկի համար՝ հուսալով Գոլանի բարձունքների վերադարձի երաշխավորություն, որոնք Սիրիան կորցրել է 1967 թվականին։ Ես ասացի նրան, որ եթե նա լուրջ է տրամադրված, ապա պետք է իր առաջարկները ներկայացնի։ Նա հարցրեց՝ ի՞նչ է դրա համար հարկավոր։ Ես կիսվեցի իմ պատկերացումներով։ Նա խնդրեց իր օգնականին նախագահ Օբամային ուղղված նամակ գրել»,- գրել է Քերին։
Նամակը ստանալով՝ Քերին ուղևորվել է Իսրայել և ցույց տվել փաստաթուղթը վարչապետ Բինյամին Նեթանյահուին։
«Նա շատ զարմացած էր Ասադի՝ այդքան հեռուն գնալու ցանկությամբ»,- գրել է նա։
Ինչպես գրում է «Հաարեց»-ը, մինչ 2011 թվականի սկիզբը Սիրիան ու Իսրայելն իրոք ԱՄՆ միջնորդությամբ բանակցություններ են անցկացրել, սակայն այդպես էլ համաձայնության չեն եկել։