Բացել ենք բենզինի շուկան, բայց բոլոր ենթակառուցվածքները 3-4 ընկերության ձեռքում են. Արծվիկ Մինասյան
Եթե բարեփոխումների այս տեմպերը շարունակվեն, մեր քաղաքացիները 2 տարի հետո միայն առարկայական կզգան փոփոխությունների արդյունքները: Այս մասին, այսօր՝ սեպտեմբերի 3-ին, իր գործունեության 100 օրն ամփոփող ասուլիսում հայտարարեց Տնտեսական զարգացման եւ ներդրումների նախարար Արծվիկ Մինասյանը:
Նրա խոսքով, ցանկացած անձ, բնական է, որ ակնկալում է, որ այս փոփոխություններից հետո իր վիճակը պետք է լավանա: «Բայց խնդիրը հետեւյալն է՝ արդյոք այս ժամանակը բավարար է, որ մարդիկ իրենց վրա զգան այդ փոփոխությունները, իհարկե՝ բավարար չեն: Դրա համար ենք ասում, որ հնարավոր չէ այս կարճ ժամկետում ակնկալել այդ մեծ ծավալի փոփոխությունը: Չի կարող դա լինել: Չի կարող տնտեսական մրցակցության համակարագը միանգամից գալ իդեալական վիճակի:
Տեսեք, մենք բացել ենք բենզինի եւ դիզվառելիքի շուկան, չկա արհեստական որեւէ խոչընդոտ: Մարդը հիմա կարող է բենզինը բերել, բայց վաճառելիս պետք է ունենա համապատասխան հսկողական փաստաթուղթը, որ չափանիշներին համապատասխանում է, թե ոչ: Բայց մեկ այլ ոլորտում մենք ունենք սահմանափակում, 3-4 կազմակերպությունների ձեռքում ամբողջ մեր բենզինի ու դիզվառելիքի ենթակառուցվածքներն են: Այսինքն երկրորդ գործողությունը պետք է լինի, որ բացվի նաեւ այս շուկան»,-հայտարարեց Արծվիկ Մինասյանը:
Նրա խոսքով, նույնը այլ շուկաներում է. «Հիմա երկրորդ շաքարի գործարանի կառուցմամբ քայլեր ենք իրականացնում: Մինչ այդ բացվել էր ամբողջությամբ ներմուծումը: Կամ ցեմենտի շուկայում, հիմա ունենք Իրանից մեծածավալ ներմուծումներ, որոնք մեր տեղական արտադրությանը խոչընդոտ է հանդիսանում, որը բերում է աշխատատեղերի կրճատման: Հիմա եթե գնաք այդ գործարանի աշխատողին հարցնեք, նա պետք է դժգոհի, որովհետեւ մենք շուկաները բացելու քաղաքականություն ենք իրականացնում, որի հետեւանքը անձի ամենօրյա աշխատանքի չգնալն է եւ նրա վրասոցիալական խնդիր ունենալը: Մեզ համար չափազանց կարեւոր է մրցակցային արդյունավետ միջավայրը, բայց դրանից ոչ պակաս կարեւոր է, որ ավելացված արժեքը իմ երկրում ստեղծվի: Մեր երկիրը պետք է կարողանա արտադրել»,-ասաց նախարարը: