Ականջներիցս լափշա են կախում, խոստանում են`խնդիրը կլուծվի. 4-րդ գյուղի բնակիչները բողոքի ակցիա են անցկացրել
Այսօր՝ սեպտեմբերի 2-ին, արտակարգ իրավիճակ է ստեղծվել Երևանում: Այս մասին հայտնում է Shamshyan.com-ը:
4-րդ գյուղի թաղամասի սկզբնամասում են հավաքվել Հաղթանակ փողոցի 500-ից ավելի բնակիչներ, ովքեր պահանջում են, որպեսզի վերջապես թաղամասում լուծեն կոյուղու խնդիրը:
«30 տարուց ավելի է՝ ինչ բնակվում ենք այս հատվածում: Բոլոր կոմունալ վճարումները կատարել ենք, ամեն ընտրություններից առաջ գալիս են, ականջներիցս լափշա են կախում, խոստանում են, որ խնդիրը կլուծվի, սակայն ստացվում է՝ Էշ մի սատկի, գարուն կգա, յոնջեն կբուսնի: Մեր ուզածը շատ բան չէ, ուզում ենք քարե դարից ազատվենք: Ով է տեսել 21-րդ դարում բնակիչն ունենա կոյուղու խնդիր:
Եթե Երևանի իշխանությունները սրտացավ մոտենան մեզ՝ բնակիչներիս, ապա խնդիրը կարճ ժամանակում կլուծվի: Բազմաթիվ անգամ նշված փողոցում տեղի է ունեցել ճանապարհատրանսպորտային պատահարներ, ցավոք, ունեցել ենք նաև մահվան դեպքեր:
Իսկ դրա պատճառը որոշ վայ վարորդների կասկադյորական վարելն է և ճանապարհին մայթ չունենալը: Երեխաներին մինչև դպրոց ու մանկապարտեզ ենք ճանապարհում, կես մարդ ենք լինում: Մայթերի տեղը կա, բայց մայթը՝ չկա: Պատկան մարմիններին թողես, հեռուստաընկերություններով կուրծք ծեծելով՝ հայտարարեն, թե Երևանի ճանապարհները չեն զիջում շատ եվրոպական երկրների ճանապարհներին:
Երևի էդ չինովնիկները 4-րդ գյուղով չեն անցել, կամ անցնելիս վարդագույն ակնոցներ են կրել: Մեր հույսը ներկա կառավարությունն է, ով հայտարարել է, որ իրավիճակ է փոխվել, բայց դեռ մենք մեր մաշկի վրա իրավիճակի փոփոխություն չենք զգացել: Այ, երբ կոյուղու և մայթերի հարցը լուծվի, իսկ դա, վստահ ենք, եթե ցանկություն ունենան, կանեն, ապա հաստատ կհամոզվենք, որ իրոք իրավիճակ է փոխվել»,- բողոքել են բնակիչները:
Ֆոտոլրագրողը հայտնում է նաև, որ բողոքի ակցիայի մասին տեղեկացվել է Երևանի քաղաքապետի պաշտոնակատար Կամո Արեյանը, ում հանձնարարականով արդեն ժամանել է Մալաթիա-Սեբաստիա վարչակաև շրջանի ղեկավարի տեղակալ Կարապետ Շահինյանը ու բնակիչների հետ բանակցություններ է վարում: