Հայ և թուրք ժողովուրդների միջև ատելությունը վերացնելու միակ ելքը Թուրքիայի կողմից Ցեղասպանության ճանաչումն է. Փոլ Բիլզերյան

Որդիների հետ եռօրյա այցով Հայաստան և Արցախ ժամանած Փոլ Բիզլերյանը վերադառնալուն պես գրառում է հրապարակել Facebook-ի իր էջում՝ կիսվելով տպավորություններով:

«Նոր եմ վերադարձել Հայաստան կատարած հիասքանչ ուղևորությունից, որտեղ հպարտորեն հետևել եմ երկու որդիներիս՝ Դենի և Ադամի երդմնակալությանը, երբ վերջիններս ՀՀ քաղաքացիություն էին ստանում», - գրել է ավագ Բիլզերյանը՝ նկատելով, որ Հայաստանն, իր ընկալմամբ, բազմաթիվ դրական փոփոխությունների է ենթարկվում:

«Որպես չորս մեծ տատիկ-պապիկների ժառանգ, որոնք սպանվել են 1915-ի Ցեղասպանության ժամանակ, ես կոչ եմ անում Հայաստանի կառավարությանը և բոլոր հետագա կառավարություններին հետևել համաշխարհային պատմության մեծագույն առաջանորդ Նելսոն Մանդելայի օրինակին և ջանալ միավորել տարբեր վայրերում գտնվող բոլոր հայերին՝ Հայաստանը բոլոր հայերի համար ավելի լավ տեղ դարձնելու նպատակի շուրջ», - գրել է ամերիկահայը:

 Անդրադառնալով Լեռնային Ղարաբաղ այցին և Ադրբեջանի կառավարության արձագանքին ու Դենի նկատմամբ հետախուզում հայտարարելուն՝ Բիլզերյանը նշել է, որ համաշխարհային առաջնորդները շատ են, սակայն նրանց մեջ քիչ են լավերը:

«Որքան հեշտ է թվում երիտասարդներին ուղարկել դեպի մահ՝ չմտածված քաղաքական նպատակներ հետապնդելով: Ինչ վերաբերում է Ադրբեջանի և Թուրքիայի ժողովուրդներին, ես նրանց խորհուրդ կտամ ինքնուրույն մտածել իրենց կառավարություններին լսելուց առաջ, երբ խոսքը վերաբերում է հայ ժողովրդի նկատմամբ ատելություն դրսևորելուն», - շեշտել է նա:

Բիլզերյանը հիշատակել է, որ Դենը մեկ օր ավել է մնացել Հայաստանում՝ Ցեղասպանության հուշահամալիր այցելելու համար:

«Դժվար է պատկերացնել, որ որևէ կառավարություն կարող է որոշել սպանել մոտ 2 մլն անմեղ կանանց, տղամարդկանց և երեխաների, սակայն դա հենց այն է, ինչ արել է թուրքական կառավարությունը 1915-ին: Որքան սարսափելի է եղել այդ արարքը, այնքան աններելի է այն, որ կառավարությունը շարունակում է հերքել կատարվածը: Հայ և թուրք ժողովուրդների միջև գոյություն ունեցող ատելությունը վերացնելու և ներողամտության հասնելու միակ ելքը Թուրքիայի կողմից Ցեղասպանությունը ճանաչելն է: Միայն այդ պարագայում կսկսվի ապաքինումը», - նկարագրել է Բիլզերյանը՝ գրառմանը կցելով Ջոն Լենոնի «All We Are Saying is Give Peace a Chance» երգը, որը, նրա կարծիքով, պետք է երգեն բոլոր դպրոցներում և խորհրդարաններում: