«Այստեղ որևէ նվաստացման երևույթ չկա». Արայիկ Հարությունյանը՝ դպրոցի տնօրենի հետ միջադեպի մասին
Տնօրենների հետ անկաշկանդ, գործընկերային զրույց է եղել, երբեմն կատակներով, երբեմն շատ մտերիմ փոխադարձումներով: Այս մասին, այսօր՝ օգոստոսի 30–ին, Կառավարության նիստից հետո լրագրողներին ասաց ԿԳ նախարար Արայիկ Հարությունյանը՝ անդրադառնալով նախօրեին դպրոցի տնօրենների հետ խորհրդակցության ժամանակ տեղի ունեցած միջադեպին:
Հիշեցնենք, որ նախօրեին Երեւանի դպրոցների տնօրենների հետ օգոստոսյան խորհրդակցության ժամանակ Արաբկիրի թիվ 130 դպրոցի տնօրեն Արմինե Հովհաննիսյանը կարեւորել էր օտարալեզու խորացված ուսուցմամբ դպրոցների բացումը, որին Արայիկ Հարությունյանն արձագանքելն էր. «Ես վստահ եմ, որ հիմա այն տեքստը, որ դուք ասեցիք հայերեն, լինելով խորացված դպրոցի նախկին աշակերտ՝ այդ տեքստն անգլերենով չէիք ասի»: Տնօրենը նույնը ասել էր անգլերեն:
Լրագրողների դիտարկմանը, թե դա խիստ տոնով ասված խոսք էր նախարարի կողմից, Արայիկ Հարությունյանն ասաց. «Ձեր եզրակացությունն է այդպիսին, որովհետեւ դուք միշտ սովոր եք եղել, որ նախարարը իր ենթակայության տակ գտնվող տնօրեններին վերեւից նայի եւ շեֆություն անի»:
ԿԳ նախարարն ասաց, որ դա եղել է շատ ուղիղ երկխոսություն տնօրենի հետ. նույն տրամաբանությամբ՝ եթե մեկը Ֆիզմաթ դպրոցից հարց տար ու ինքն ասեր՝ այսինչ բանաձեւը արդյոք հիշո՞ւմ է, նրա մեկնաբանմամբ, նույնն էր լինելու։ «Այսինքն այստեղ որեւէ նվաստացման երեւույթ չկա եւ առհասարակ ինձ ով ճանաչում է, նվաստացման որեւէ օրինակ չի կարող բերել»,–ասաց նախարարը։
Հարցին՝ արդյոք նախարարը կասկածո՞ւմ է ուսուցիչների կամ տնօրենների գիտելիքների հարցում, Արայիկ Հարությունյանը պատասխանեց. «Ոչ, այդպիսի մեկնաբանություն չի կարող լինել։ Իր ասածը ինչ էր. ասում էր՝ կարեւոր են խորացված ուսուցմամբ դպրոցները ու ասաց, որ ինքն ավարտել է այդ դպրոցը։ Գործընկերային մթնոլորտում ասվել է, որ եթե ավարտել եք այդ դպրոցը, արդյոք այն, ինչ ասացիք հայերեն, կարող եք ասել անգլերեն։ Այսինքն խորքային գիտելիք տվե՞լ է այդ դպրոցը, թե ոչ»։
Նախարարը ավելացրեց. «Շատ ուշադիր եղեք, այս կառավարությունը շատ է տարբերվում նախորդ կառավարություններից, այստեղ գործընկերային հարաբերություններ են, այլ ոչ թե շեֆական հարաբերություններ»։