Յոլա գնալու ռեժիմը պետք է հանենք, հիմա առաջ գնալու ժամանակն է, հերիք է՝ ինչքան յոլա գնացինք. Նիկոլ Փաշինյան
Յոլա գնալու ռեժիմը պետք է հանենք, հիմա առաջ գնալու ժամանակն է, հերիք է՝ ինչքան յոլա գնացինք: Այս մասին Գումի շուկայի վաճառողների հետ հանդիպմանն ասաց ՀՀ վարչապետ Նիկոլ Փաշինյանը:
Վարչապետը շրջայց է կատարում Գումի շուկայում՝ ծանոթանալու համար գյուղմթերքի գներին: Նա ահազանգեր էր ստացել, որ գյուղմթերքի գները թանկացել են:
«Լոլիկն 800 դրամո՞վ եք վաճառում, այս սեզոնին տարօրինակ է: Տարօրինակ է, որ այս սեզոնին ջերմոցի լոլիկ է հայտնվել շուկայում: Իսկ տանձը 300-ից 2000 դրամով է վաճառվում:»,- նշեց վարչապետը, ինչին ի պատասխան վաճառողները տեղեկացրին, որ լոլիկի գինը տատանվում է 150-1000 դրամ՝ կախված որակից:
Հարց ու պատասխանի ժամանակ վարչապետին հայտնեցին, որ բացի լոլիկից նաև թանկացել է վարունգը, ձմերուկը, սմբուկը:
«Գյուղացիները թանկ են տալիս, թանկ ենք վաճառում: Բայց պատճառը եղանակն է, այս տարի շոգ էր, շոգը ամեն ինչ վառեց»,- ասացին վաճառողները:
Վարչապետ Նիկոլ Փաշինյանը հայտարարեց, որ պետք է աշխատել գյուղմթերքի գների նվազեցման ուղղությամբ. «Հիմա խնդիր չկա գների վրա ազդելու, բայց քաղաքականության միջոցով երկարաժամկետ հատվածում պետք է փորձել գները նվազեցնել»,-ասաց վարչապետը:
Շուկայի մեկ այլ վաճառողից, ով իր սեփական արտադրանքն էր վաճառում, վարչապետը հետաքրքրվեց, թե բարեկեցության ինչ մակարդակ ունի իր ընտանիքը. «6000 մ հող ունենք, միջին մակարդակի ենք ապրում: Այս տարի լավ չէ, մի քիչ էլ առևտուրը նստել է: Ժողովուրդն ավելի շատ սուպերմարկետներից է առևտուր անում, ոչ թե շուկաներից: Մենք էլ չենք մեր ապրանքը վաճառել»,- ասաց գյուղացին: