Մարդիկ մոտեցան և ասացին, որ գալու են Հայաստան. Մխիթար Հայրապետյան (տեսանյութ)
Օգոստոսի 21-ին, լրագրողների հետ հանդիպմանն ՀՀ սփյուռքի նախարար Մխիթար Հայրապետյանը ասաց.
«Սփյուռքի նախարարությունը պատրաստվում է առաջարկներ ներկայացնել ԱԳՆ և վարչապետին՝ մեծ համայնքներ ունեցող դիվանագիտական հաստատություններում ապահովել Սփյուռքի նախարարության ներկայացուցիչներ, որոնք համայնքի հետ ամենժամյա կապի մեջ կլինեն»։
Ամփոփելով Կիպրոս և ԱՄՆ կատարած այցերը՝ նախարարը հայտնեց, որ բոլոր քաղաքական ուժերի, կազմակերպությունների, եկեղեցական կառույցների ներկայացուցիչների մոտ կար դրական մոտեցում՝ կապված այն բոլոր իրադարձությունների հետ, որոնք տեղի են ունենում Հայաստանում՝ կոռուպցիայի դեմ պայքար, օրինականության հաստատում և այլն։
«Շատ մեծ հեռանկար կա մեծ թափով հայրենադարձություն ապահովելու համար, բայց Հայաստանը պատրաստ չէ մեծ ներգաղթի։ Հիմնական երկու խնդիր է հետաքրքրում պոտենցիալ հայրենադարձներին՝ օրինականության ապահովումը երկրում և աշխատատեղերի հարցը։ Ներդրումների հետ կապված բազմաթիվ են հարցերը՝ արտոնյալների հետ կապված, իսկ հայրենադարձության մասով խնդիրներ կան, օրինակ՝ ֆիզիկական անձանց գույքի մաքսազերծման, տեղափոխման վերաբերյալ»,- նշեց նախարարը։
Օգոստոսի 17-ին կայացած հանրահավաքի ժամանակ ՀՀ վարչապետ Նիկոլ Փաշինյանը հայտարարել է, որ այս տարվա մայիսի 10-ից օգոստոսի 14-ն ընկած ժամանակահատվածում ՀՀ է ժամանել 29986 մարդով ավելի շատ, քան մեկնել է:
Նախորդ տարվա նույն ժամանակահատվածում մեկնածների թիվը 6000-ով ավելի էր եկածներից: Փորձագետների կարծիքով՝ եթե այս երևույթը շարունակական լինի, ապա տարին հնարավոր է ամփոփել ներգաղթով:
«Իհարկե, չենք կարող պնդել, որ բոլոր 29 հազարը հայրենադարձներ են, բայց կարող եմ ասել, որ ԱՄՆ-ում ավելի քան 100 ընտանիք ինձ ասացին, որ տները վաճառքի են հանել։ Մարդիկ մոտեցան և ասացին, որ գալու են Հայաստան։ Այս պահին տվյալներ չկան, բայց վերադառնալ ցանկացողները շատ են»,- ասաց Մխիթար Հայրապետյանը։
Նրա խոսքով՝ հայրենադարձությունը պետության քաղաքականության հիմնական ուղղություններից է, բայց կարևոր է նաև հայապահպանության հարցը։
«Միայն հայաստանակենտրոն մոտեցումն ընդունելի չէ մեզ համար։ ՀՀ-ը պետք է սկսի լուծել Սփյուռքում առկա խնդիրները, հայերի շահերը դրսում ներկայացնելու գործում Սփյուռքի նախարարությունը պետք է ևս ունենա իր ներգրավվածությունը։ Ի վերջո, ուժեղ Սփյուռքը նպաստելու է ՀՀ-ում տնտեսության զարգացմանը, անվտանգության բարձրացմանը և այլն»,- ասաց նա։
Մանրամասն` տեսանյութում: