Բազմաթիվ կոռումպացված դեմքեր շարունակում են «տեղը չբերել» ժողովրդական հեղափոխությունը. Նիկոլ Փաշինյան
Օգոստոսի 17-ին՝ պաշտոնավարման 100 օրն ամփոփող հանրահավաքի ժամանակ ՀՀ վարչապետ Նիկոլ Փաշինյանը հայտարարեց.
«Չափազանց կարևոր եմ համարում, որ դատական համակարգի այսօրվա վիճակը արձանագրելով՝ լուրջ քննարկում ունենանք ևլուծում տանք անցումային արդարադատության մարմինների ստեղծման հարցին։
Նա անցումային արդարադատության մարմինների անհրաժեշտությունն այսպես հիմնավորեց.
«Անցումային արդարադատության մարմինները մեզ կարող են անհրաժեշտ լինել ոչ միայն այն պատճառով, որ մեր դատական համակարգի բազմաթիվ կոռումպացված դեմքեր շարունակում են «տեղը չբերել» ժողովրդական հեղափոխությունը, այլ նաեւ այն պատճառով, որ մեր օրենսդրության մեջ կան բազմաթիվ խնդիրներ:
Օրինակ՝ ապօրինի հարստացման մասին օրենքը ուժի մեջ է մտել 2017 թվականի հունիսի 1-ից եւ ֆորմալ առումով 2017 թվականի հունիսի 1-ից առաջ թալանվածը վերադարձնելը կարող է բարդություններ առաջացնել»։
Փաշինյանը որպես օրինակ մի դեպք պատմեց, երբ ՀՀ բարձրաստիճան պաշտոնյաներից մեկի հարազատ եղբոր միայն մեկ բանկային հաշվեհամարում հայտնաբերվել է 30 մլն դոլար:
«Այս մարդը ֆորմալ առումով երկար տարիներ պետական պաշտոնյա չի եղել, հայտարարագիր չի ներկայացրել, ուստի կան դժվարություններ այդ գումարը հետաքննելու եւ օրենքով սահմանված կարգով առգրավելու առումով: Սա է պատճառը, որ պետք է մտածենք անցումային արդարադատության նոր մարմիններ ձեւավորելու մասին»,- ասաց նա:
Վարչապետը, սակայն, հորդորեց արդարադատության նոր մարմինները չշփոթել արտակարգ դատարանների հետ։
«Բազմաթիվ միջազգային կազմակերպություններ ու գործընկեր պետություններ պատրաստակամություն են հայտնում աջակցել օտարերկրյա պետություններում ու օֆշորային գոտիներում ՀՀ բարձրաստիճան պաշտոնյաների ունեցած ակտիվները բացահայտելու, սառեցնելու եւ ՀՀ վերադարձնելու հարցում»,- ասաց վարչապետը։