Նոր Զելանդիայում գործադուլին մասնակցել է շուրջ 30 հազար ուսուցիչ
Նոր Զելանդիայում չորեքշաբթի առավոտյան կրտսեր և միջին դպրոցների առնվազն 29 հազար ուսուցիչ 24 տարվա ընթացքում առաջին անգամ գործադուլի է մասնակցել, հաղորդում է РИА Новости-ն՝ հղում անելով Radio New Zealand-ին:
Գործադուլին մասնակցել են միայն Zealand Educational Institute (NZEI) արհմիության անդամ ուսուցիչները: Նրանց հիմնական պահանջն է բարձրացնել աշխատավարձը և կրճատել դասարաններում աշակերտների թիվը:
Ուսուցիչների գործադուլը երկրի հարյուրավոր դպրոցների փակման և 400 հազար աշակերտի դասընթացների հետաձգման է հանգեցրել: Երկրի մայրաքաղաք Վելինգտոնում տեղի ունեցած ակցիայի մասնակիցները հայտարարել են երկօրյա գործադուլի հավանականության մասին, եթե իրենց պահանջները չքննարկվեն կրթության նախարարության կողմից:
Նոր Զելանդիայի վարչապետ Ջասինդա Արդերնը ելույթ է ունեցել մայրաքաղաքում հավաքված բազմության առջև՝ հայտարարելով, որ արմատական փոփոխությունները ժամանակ են պահանջում և կոչ է արել ուսուցիչներին աշխատել կառավարության հետ: