Ռոբերտ Քոչարյանն այսօր ներկա է եղել նիստին և տպավորիչ ելույթ է. պաշտպան
Երկրորդ նախագահ Ռոբերտ Քոչարյանի խափանման միջոց կալանքը պետք է փոխվի և դատարանը կարող է կիրառել ստորագրություն չհեռանալու մասին, եթե մտավախություն ունի՝ նա երկրից կարող է մեկնել: Այս մասին այսօր՝ օգոստոսի 10-ին, նիստից հետո լրագրողների հետ զրույցում ասաց Քոչարյանի պաշտպաներից Արամ Օրբելյանը:
Պաշտպանը նշեց, որ Ռոբերտ Քոչարյանն այսօր ներկա է եղել նիստին և տպավորիչ ելույթ է ունեցել՝ ներկայացնելով իր դիրքորոշումը:
«Ակնկալիքները դրական են, կարծում եմ՝ դատարանը պետք է բավարարի մեր բողոքը»,-ասաց նա:
Արամ Օրբելյանը ընդգծեց, որ մեղադրանքի կողմի պնդումները, թե ազատության մեջ գտնվելով Ռոբերտ Քոչարյանը կարող է ազդեցություն գործել, հիմնավորված չեն. «Պարոն Քոչարյանը, լինելով արտերկրում և գիտակցելով, որ Միքայել Հարությունյանին մեղադրանք է առաջադրվել և չի կարող իրեն էլ մեղադրանք չառաջադրվել, այնուամենայնիվ, ներկայացավ քննչական մարմին: Երբ իրեն մեղադրանք են առաջադրել, էլի չի թաքնվել, ներկայացել է դատարան կալանքի որոշմանը եւ այս ամեն ինչն ապացուցում է, որ նա թաքնվելու խնդիր չուներ»,-ասաց Արամ Օրբելյանը:
Պաշտպանը հավելեց, որ երկրորդ նախագահը պահման պայմաններից չի բողոքում, ունի մարզվելու, զբոսանքի հնարավորություն: