Վաչագան Ղազարյանի և նրա կնոջ գործողությունները քրեական հանցանք չեն. բողոքը Վճռաբեկ դատարանում է
Սերժ Սարգսյանի թիկնազորի նախկին պետ Վաչագան Ղազարյանի փաստաբան Արմեն Հարությունյանը Վերաքննիչ դատարանում մերժումից հետո Վճռաբեկ դատարան բողոք է ներկայացրել։ Ամուսիններ Վաչագան Ղազարյանի և Ռուզաննա Բեգլարյանի վերաբերյալ քրեական գործը քննվում է մեկ վարույթում։ Նրանց պաշտպանական կողմը, որն իրականացնելու է նաև նրա կնոջ՝ Ռուզաննա Բեգլարյանի պաշտպանությունը, պնդում է, որ իր պաշտպանյալները ՀՀ քրեական օրենսգրքի 310.1 և 314.3 հոդվածների սուբյեկտներ չեն։
«Մեր դիրքորոշումը չի փոխվել. Մենք համարում ենք, որ ոչ Վաչագան Ղազարյանը, ոչ էլ իր կինը չեն կարող հանդիսանալ իրենց մեղադրանքում նշված հանցագործությունների սուբյեկտ։ Սա մեր իրավական գնահատականն է, որի շուրջ այս պահին Վճռաբեկ դատարանում առկա է բողոք և սպասում ենք դրա քննությանը», - Aysor.am-ի թղթակցի հետ զրույցում ասաց փաստաբան Հարությունյանը։
Նրա խոսքով՝ այդ հարցի վերաբերյալ վերաքննիչ բողոքին Վերաքննիչ քրեական դատարանը չի անդրադարձել և այդ կապակցությամբ դիմել են Վճռաբեկ դատարան, որտեղ Ղազարյանների պաշտպանությունը նախադեպային որոշում է ակնկալում։
Փաստաբանն ավելի հստակ է ձևակերպում վռաբեկ բողոքի էությունը. «Վաչագան Ղազարյանը և նրա կինը մեղադրվում են մի արարքի համար, որը քրեական պատասխանատվության չի կարող ենթարկել։ Այսինքն՝ այն պաշտոնը, որը Վաչագան Ղազարյանը զբաղեցրել է 2017-ին, դա օրենքի ուժով ապաքրեականացվել է։ Այսինքն՝ այդ պաշտոնը, ի թիվս այլ պաշտոնների, հանվել է ապօրինի հարստացման և կեղծ հայտարարգրման պաշտոնների ցանկից»։
Արմեն Հարությունյանը պնդում է, որ Ղազարյանների նկատմամբ առաջադրված մեղադրանքը հիմնավոր, օրինական չէ, բայց միաժամանակ չի շտապում այն համարել քաղաքական հետապնդում Ղազարյանի նկատմամբ։ «Ես չեմ կարող իրավական շրջանակներից դուրս գալ ու նման հայտարարություններ անել։ ՀՔԾ-ն ունի իր տեսակետը, իր մեկնաբանությունը, մենք էլ՝ մերը։ Չենք ուզում որևէ քաղաքական էլեմենտ տեսնել նրանց (իրավապահների-հեղ.) գործողություններում։ Սա զուտ մասնագիտական ոլորտում գործընթացներ են՝ մենք մեր դիրքորոշումն ենք հիմնավորում, ՀՔԾ-ն՝ իրենը, կա դատարան, որը, կարծում եմ, եթե լինի օբյեկտիվ, կկայացնի ճիշտ վճիռ», - հավելեց Հարությունյանը։
Հիշեցնենք՝ Վաչագան Ղազարյանին մեղադրանք էր առաջադրվել ապօրինի հարստացման համար, այսինքն՝ նա ՀՀ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները: Իսկ կնոջը՝ Ռուզաննա Բեգլարյանին մեղադրանքն առաջադրվել էր այն բանի համար, որ լինելով պաշտոնատար անձ Վ. Ղազարյանի ընտանիքի կազմի մեջ մտնող անձ, թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները, ինչպես նաև ապօրինի հարստացել է։
Մասնավորապես, ըստ ՀՔԾ-ի, քննությամբ հիմնավորվել է, որ Վաչագան Ղազարյանն իր՝ 2017թ.-ի գույքի, եկամուտների և փոխկապակցված անձանց հայտարարագրում, ինչպես նաև պաշտոնեական պարտականությունները դադարեցնելու օրվա՝ 2018թ.-ի մայիսի 17-ի դրությամբ առկա գույքի, եկամուտների և փոխկապակցված անձանց հայտարարագրում թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները, որը հանգեցրել է առանձնապես խոշոր չափերով գույքի՝ 460.000.000 ՀՀ դրամի, 615.268.944 ՀՀ դրամին համարժեք՝ 1.272.900 ԱՄՆ դոլարի և 124.371.180 ՀՀ դրամին համարժեք՝ 218.000 եվրոյի չհայտարարագրմանը:
Դիտարկմանը, թե հանրության մոտ տարակուսանք էր առաջացել՝ որտեղի՞ց այդքան գումար նախագահի թիկնազորի պետին, փաստաբանը արձագանքեց.
«Մենք մեր դիմումներում ու բողոքներում հիմնավորել ենք, որ Վաչագան Ղազարյանին առնչվող գումարների մասով նույնիսկ օրենքը արգելում է քրեական հետապնդում իրականացնել, որովհետև դա կարող է վերաբերել այն գումարներին, որոնք ձեռք են բերվել 2017-ի հուլիսի 1-ից հետո մինչև 2018-ի ապրիլի 9-ը, քանի որ ապօրինի հարստացման ու կեղծ հայտարարգրերի մասին օրենքն այդ ժամանակ է ընդունվել։ Դրանից առաջ չի եղել նման հանցագործություն, պաշտոնատար անձը ինչ գումարներ կունենա, կհայտարարգրի, թե չի հայտարարագրի, դրա համար չի կարող քրեական պատասախանտվության ենթարկվել։ Այդ փաստից չենք կարող խուսափել, ինչքան էլ հանրության ականջին այդ ամենը տհաճ լինի։ Կա օրենք, դրանով պետք է առաջանորդվենք», - ասաց փաստաբան Հարությունյանը։