ԱՄՆ-ը պատրաստվում է խստացնել պատժամիջոցները Իրանի դեմ

ԱՄՆ-ի պետքարտուղար Մայք Փոմպեոն հայտարարել է, որ Վաշինգտոնը մտադիր է նույնիսկ ավելի խիստ պատժամիջոցներ սահմանել Թեհրանի դեմ, քան նրանք, որոնք գոյություն ունեին 2015 թվականին իրանական միջուկային ծրագրի վերաբերյալ միջազգային համաձայնագրի ստորագրումից առաջ:

«ԱՄՆ-ը պատրաստվում է խստացնել պատժամիջոցները»,- լրագրողներին ասել է դիվանագետը:

Նա նշել է, որ պատժամիջոցները պատասխան են Իրանի ղեկավարությանը «չարամիտ գործողություններին», և որ պատժամիջոցների աղետալի հետևանքների համար պատասխանատվությունն ընկնում է իրանական կառավարության վրա:

Օգոստոսի 6-ին լրանում է այն ժամկետը, որից հետո ԱՄՆ-ը պետք է վերականգնի Իրանի դեմ պատժամիջոցների առաջին մասը:  ԱՄՆ-ի Պետդեպարտամենտի քաղաքական պլանավորման գծով տնօրեն Բրայան Հուքը հայտարարել է, որ այդ պատժամիջոցները կվերաբերեն Իրանի ավտոմոբիլային սեկտորին, ինչպես նաև ոսկու և այլ մետաղների առևտրին:

Հակաիրանական պատժամիջոցներ երկրորդ մասը պետք է ուժի մեջ մտնի մինչև նոյեմբերի 4-ը: Այդ սահմանափակիչ միջոցները կվերաբերեն Իրանի էներգետիկական հատվածին, ածխաջրածնային հումքին առնչվող տրանզակցիաներին եւ Իրանի կենտրոնական բանկի հետ կապված տրազակցիաներին:

ԱՄՆ-ի նախագահ Դոնալդ Թրամփը մայիսի 8-ին հայտարարել է, որ Վաշինգտոնը դուրս է գալիս միջուկային ծրագրի վերաբերյալ Իրանի հետ համաձայնագրից և վերականգնում է Իրանի դեմ բոլոր պատժամիջոցները, այդ թվում՝ պատժամիջոցներն այն երկրների նկատմամբ, որոնք բիզնես են վարում Իրանի հետ: