Երևանում անշարժ գույքը թանկացել է
Երևանում անշարժ գույքի գները մեկ տարվա ընթացքում էական աճ են արձանագրել: Թանկացել են հատկապես Երևանի Կենտրոն վարչական շրջանի բնակարանները: Ընդ որում, թանկացումն սկսվել է ապրիլից և շարունակական բնույթ է կրել: Եթե ապրիլ ամսին Երևանի կենտրոնում բնակարանների մեկ քմ արժեքը 507 200 դրամ էր, ապա արդեն հունիսին գինը հասել է 530 000 դրամի:
Կենտրոնում բազմաբնակարան շենքերում բնակարանների մեկ քմ արժեքը սահմանվել է 530 000 դրամ՝ նախորդ տարվա նույն ամսվա 451 500-ի փոխարեն:
Արաբկիր վարչական շրջանում բնարականների մեկ քմ արժեքը հունիսին կազմել է 368 950՝ նախորդ տարվա նույն ամսի 341 050-ի փոխարեն, Դավթաշեն վարչական շրջանում այս տարվա հունիսին՝ 288 200 դրամ՝ նախորդ տարվա նույն ամսի 250 000-ի փոխարեն, Քանաքեռ-Զեյթուն վարչական շրջանում՝ 276 100 դրամ՝ նախորդ տարվա հունիսի 268 000-ի փոխարեն:
Թանկացումն արձանագրվել է բոլոր վարչական շրջաններում: Սրան զուգահեռ, մայրաքաղաքում ավելացել են բազմաբնակարան շենքերի բնակարանների նկատմամբ առուվաճառքի գործարքները:
Եթե նախորդ տարվա հունիսին գրանցվել էր 893 առուվաճառքի գործարք, այս տարվա նույն ամիսն այդ թիվը կազմել է 1267: Հանրապետության մասշտաբով առուվաճառքի գործարքները հունիսին կազմել են 1696, իսկ նախորդ տարվա նույն ամսին 1264 էր: