Գյուղմթերքների արտադրողականությունը պակասել է, դա է պատճառը որ գյուղմթերքը թանկ է

«Հայոց աշխարհ» թերթը գրում է. «Ամռանը մեկ ամիս մնաց, իսկ գյուղմթերքների շուկայում այդպես էլ գնանկման միտում չնկատվեց: Հակառակը, գներն օրեցօր աճում են՝ քաղաքաբնակներիս ստիպելով կրճատել վիտամինների պահանջարկը լրացնելու հնարավորությունները, հրաժարվել պահածո, չիր պատրաստելու սովորությունից:

«Ագրարագյուղացիական միավորում» հասարակական կազմակերպության նախագահ Հրաչ Բերբերյանը հիմնական պատճառը համարում է նոր իշխանությունների սխալ կառավարումը, ինչն էլ ոլորտում նման վիճակ է ստեղծել: Խնդիրն, իհարկե, նոր չէ, բայց կառավարութունը չի կարողանում այն կանխել և կարծես թե նման մտադրություն էլ չունի՝ դատելով իրականացրած կամ ավելի ճիշտ՝ չիրականացրած քայլերից:

Հրաչ Բերբերյանը հավաստիացնում է՝ տևական և նորմայից բարձր շոգ եղանակը և ոռոգման ջրի պակասը զգալիորեն կրճատել են գյուղմթերքի ծավալը, ինչն էլ հանգեցրել է գների բարձրացման. «Գյուղմթերքների արտադրողականությունը պակասել է, դա է պատճառը, որ գյուղացիները ավելի թանկ գնով են այն իրացնում, որպեսզի կարողանան իրենց վարկերը փակել, մյուս տարվա համար սերմեր, պարարտանյութ գնել և իրենց ապրուստը հոգալ: Չկարծեք, թե նրանք քմահաճույքի համար են բարձր գին ասում:

Այս տարի, օրինակ, ծիրանի կայուն քանակությամբ բերք ունեցանք,ևւ մրգի գինը մատչելի էր ազգաբնակչության համար: Բայց նույնը չի կարելի ասել մյուս մրգերի, հատապտուղների և առհասարակ բանջարեղենի մասին:

Այս ամենի պատճառը գյուղացուն ոռոգման ջրից զրկելն է, և բիզնես ոլորտը գյուղատնտեսությունից գերակա համարելը: Ջրի անկանոն մատակարարումը Արարատյան դաշտում, հատկապես Շիրակի գոտում, անմխիթար վիճակ է ստեղծել այն աստիճան, որ ֆերմերները խուճապի մեջ են, թե ինչպես են կարողանալու այդ փոքրաքանակ մթերքով պարտքերը մարել»:

Մանրամասն՝ թերթի այսօրվա  համարում: