Պետք է հասկանանք՝ ՏԻՄ-երի անկախությունը թողնում ենք ու ավելի մեծանում, թե գնում ենք ուղիղ կառավարման. ՏԿԶ փոխնախարար
ԱԺ-ում «Համայնքներում առկա խնդիրները, տարածքային համաչափ զարգացման հնարավորությունները ՀՀ-ում» թեմայով քննարկմանը ՀՀ տարածքային կառավարման և զարգացման փոխնախարար Դավիթ Գևորգյանն անդրադարձավ ՏԻՄ ընտրությունների հարցին, թե ինչպես է ավագանին ընտրվում:
«Ինչ ծրագիր էլ մտածենք, եթե ինքը գնալու է, բախվի անտարբեր համայնքի բնակչին, գնալու է բախվի համայնքի մասին չմտածող համայնքի ղեկավարին, մենք արդյունք չենք ստանալու, փաստացի ունենք այդ խնդիրը»,-ասաց նա:
Նա օրինակ բերեց սուբվենցիաների ծրագիրը, որը, ըստ նրա, հիանալի ծրագիր է: «Տնտեսական բնույթի ծրագրերը կառավարությունը համաֆինանսավորում է 60 տոկոսով, սոցիալական բնույթի ծրագրերը՝ 40%-ով: Տեսեք՝ ինչ խնդիր ունենք այստեղ, ինչ պատկեր. 6000 հոգանոց համայնքը 300 մլնից ավելի 6-7 սուբվենցիայի հայտ է ներկայացրել, բայց 30 հազարանոց համայնքը, որ ավելի լավ վիճակում է, ոչ մի ծրագիր չի ներկայացրել»,-ասաց նա:
Ըստ փոխնախարարի՝ խնդիրն այն է, որ համայնքը պետք է որոշի՝ ինչ խնդիր ունի: «Սա համայնքների անկախության տրամաբանության մեջ է: Իմ պաշտոնավարումից հետո ես հատ առ հատ հայտերը նայում եմ, համայնքի ղեկավարին զանգել եմ, ասել՝ ինչու ես 1,5 մլն դրամի արժողությամբ մշակույթի տուն սարքում, եթե ոռոգման ջուր չունենք, ասում է՝ համայնքի բնակիչները չեն ուզում: Ասում եմ՝ ի՞նչ է, հայտնագործել ենք, որ առանց ջրի կարող են հող ոռոգել, ասում է՝ կոյուղաջրերով հարցը լուծում են, պատկերացնում եք՝ ինչ աղետ է»,-ասաց նա:
Փոխնախարարը նշեց, որ պետք է հասկանան, թե որ ճանապարհով ենք գնում: «Պետք է հասկանանք, ՏԻՄ-երի անկախությունը թողնում ենք ու ավելի ենք մեծանում, բայց պետք է ավելի արդյունավետ լինեն ՏԻՄ-երի կառավարիչները, թե գնում ենք ուղիղ կառավարման, այդ դեպքում իմաստ չի ունենալու ՏԻՄ-եր ունենալ, կարող ենք 200 -300 հոգանոց նախարարություն պահել, ՏԻՄ-երում ներկայացուցիչ նշանակենք ու հարցը փակենք: Կարծում եմ՝ առաջին տարբերակն է ճիշտը, բայց համայնքի բնակիչը պետք է մասնակցի, համայնքի դուռը ջարդի, ասի՝ ինչու եք սենց որոշել, կամ որոշումը կատարել եք»,-ասաց նա:
Նա ևս մեկ օրինակ բերեց, թե հեռավոր գյուղում, ըստ հաշվետվության, 10 մլն դրամի բնապահպանական ծախսեր է արել, որը, ըստ նրա, այդքան էլ համոզիչ չի:
«Մարզի կառավարման տրամաբանությունը պետք է փոխվի: Կոմպլեքս պատկերացում պետք է ունենանք, համայնքի ղեկավարներն իրենց համայնքի զարգացման ռազմավարությունը պետք է մշակեն, տեսնեն՝ ոնց են զարգացնում իրենց համայնքները»,-ասաց նա: