ՀԱՊԿ կանոնադրության ու այլ փաստաթղթերի վերաբերյալ հրապարակային քննարկումներն անարդյունավետ են. Երևանի պատասխանը Մոսկվային
Երևանում ոչ արդյունավետ են համարում հրապարակային քննարկումներն ու պարզաբանումները ՀԱՊԿ-ի կանոնադրության ու այլ փաստաթղթերի վերաբերյալ։
«Ոչ արդյունավետ ենք համարում հրապարակային քննարկումներն ու պարզաբանումները ՀԱՊԿ-ի կանոնադրության, ընթացակարգերի կանոնների և այլ փաստաթղթերի վերաբերյալ, որոնք մեզ շատ լավ հայտնի են, և որոնց խիստ համապատասխանության պայմաններում Հայաստանը կառուցում է համագործակցությունը ՀԱՊԿ շրջանակում», - «Ինտերֆաքս» գործակալությանն ասել է Երևանում բարձրաստիճան դիվանագիտական աղբյուրը՝ մեկնաբանելով գործակալության խնդրանքով Մոսկվայում բարձրաստիճան դիվանագիտական աղբյուրի հայտարարությունն այն մասին, որ ՀԱՊԿ գործընկեր պետություններին ուղղված Հայաստանի առաջարկը՝ սկսել Կազմակերպության գլխավոր քարտուղարի փոխարինման գործընթաց, ոչ պրոֆեսիոնալ է։
«Մեր ռուս գործընկերների հետ ունենք կառուցողական և բովանդակային երկխոսություն երկկողմ և բազմակողմ օրակարգի բոլոր ուղղություններով, որն իրականացվում է հայ-ռուսական դաշնակցային հարաբերությունների ոգուն համապատասխան և շփման վստահելի կայացած խողովակներով», - ասել է գործակալության զրուցակիցը։
Ավելի վաղ Մոսկվայում բարձրաստիճան դիվանագիտական աղբյուրը ТАСС-ին ասել էր, որ Երևանը պետք է գրավոր ծանուցում ուղարկի ՀԱՊԿ, և միայն դրանից հետո գործի կդրվի ՀԱՊԿ գլխավոր քարտուղար Յուրի Խաչատուրովի լիազորությունների դադարեցման ընթացակարգը։
«Եթե Երևանում որոշել են, որ պ-ն Խաչատուրովն այժմ իրենց չի բավարարում այդ պաշտոնում, ապա Հայաստանից ՀԱՊԿ-ը պետք է ստանա համապատասխան գրավոր ծանուցում: Միայն դրանից հետո գործի կդրվի պաշտոնական ընթացակարգը՝ և ոչ թե «գլխավոր քարտուղարի փոխարինման», այլ նրա լիազորությունների դադարեցման», - նկատել է աղբյուրը:
Գործակալության զրուցակիցը նաև նշել է, որ Ռուսաստանը ոչ պրոֆեսիոնալ է համարում Հայաստանի ԱԳՆ հայտարարությունն այն մասին, որ Երևանը ՀԱՊԿ գործընկեր պետություններին առաջարկել է սկսել Գլխավոր քարտուղարի փոխարինման գործընթաց, քանի որ Հայաստանն ինքը պետք է սկսի գլխավոր քարտուղարի փոխարինման գործընթացը, որն այդ երկրի ներկայացուցիչ է:
Հիշեցնենք՝ Հայաստանը ՀԱՊԿ գործընկեր պետություններին առաջարկել է սկսել Գլխավոր քարտուղարի փոխարինման գործընթաց:
Նշենք նաև, որ այսօր ՀԱՊԿ գործունեության հետ կապված հեռախոսազրույցներ են տեղի ունեցել Ռուսաստանի և Բելառուսի արտգործնախարարներ Սերգեյ Լավրովի և Վլադիմիր Մակեի, նաև՝ հայկական կողմի նախաձեռնությամբ հեռախոսազրույց է տեղի ունեցել Հայաստանի վարչապետ Նիկոլ Փաշինյանի և Բելառուսի նախագահ Ալեքսանդր Լուկաշենկոյի միջև։
Ավելի վաղ տեղեկացրել էինք, որ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
Դատարանի որոշմամբ նա կալանավորվել է, սակայն ազատ է արձակվել գրավի դիմաց։