на Русском
Վնասներ Երևանում՝ քամու հետևանքով
Լարված իրավիճակ Կիրանց, Բաղանիս և Ոսկեպար գյո... 
Ներում-զիջում չի լինի. օրինախախտ վարորդները նոր տեսակի տուգանքի կենթարկվեն՝ բալային համակարգով
Շուտով ՀՀ ճանապարհային ոստիկանությունն օրինախախտ վարորդների հանդեպ պատժի նոր մեթոդ է կիրառելու՝ բալային համակարգ: Այս մասին այսօր «ֆեյսբուքյան» ուղիղ եթերում քաղաքացիների հետ հարցուպատասխանի ժամանակ հայտարարեց Երեւանի ՃՈ պետի տեղակալ Արմեն Խաչատրյանը:
Նա հիշեցրեց, որ մայիսի 23-ից ճանապարհային երթեւեկության կանոնների խախտումների ինտենսիվություն է նկատվում: Հիշեցնենք՝ այդ ժամանակահատվածում հայտարարվեց, որ մի քանի տարվա վարչական տուգանքները (վարչապետ Նիկոլ Փաշինյանի կարգադրությամբ) ներվելու են, ինչից հետո վարորդների մի մասն առիթից օգտվում է եւ խախտումներ անում:
«Իրավախախտումների քանակը ավելացել է որոշակի խմբի վարորդների կողմից, որոնք ճիշտ չեն ընկալել վարչական տուգանքները ներելու մեր քաղաքականությունը: Նրանք ավելի շատ խախտումներ են թույլ տալիս, մինչդեռ դրանից պետք է խուսափել՝ անկախ նրանից՝ տվյալ հատվածում ոստիկանությունը վերահսկո՞ւմ է իրողությունը, թե ոչ»,-արձանագրեց Արմեն Խաչատրյանը:
Նա հայտնեց, որ Ոստիկանության թիրախում կլինեն հենց այդ խմբի վարորդները, որոնք հերիք չէ՝ խախտումներ են անում, նաեւ՝ ինչ-ինչ պատճառներով չեն վճարում վարչական տուգանքները. «Նրանց հանդեպ կգործի բալային համակարգ՝ բաղկացած ինը բալից: Որոշակի խախտումներ կատարելուց հետո բալերն աստիճանաբար կսպառվեն, ինչի հետեւանքով տրանսպորտային միջոց վարելու իրավունքը կկասեցվի վեց ամսով: Վստահ ենք, որ այս մեթոդով կկարողանանք նվազագույնի հասցնել խախտումների քանակը»:
Օգտատերերից մեկն էլ այս խնդրի շուրջ մեկնաբանություն էր գրել, որ վարորդների խախտումների պատճառով «քաղաքում խայտառակ վիճակ» է: Ճանապարհային ոստիկանության պետ Եգոր Կարապետյանն այս առնչությամբ նշեց, որ գրեթե ամեն օր երեկոյան ժամերից ուժեղացված ծառայություն է կատարվում՝ մինչեւ գիշերվա ժամը երկուսը. «Համապատասխան աշխատանք տանում ենք: ՃՈ-ն խիստ է վերաբերվելու օրինախախտ վարորդներին ու հետիոտներին: Ներում-զիջում չի լինելու, ուստի կրկին կոչ ենք անում՝ պահպանեք ճանապարհային երթեւեկության կանոնները»:
