Չգրանցված աշխատողներ ունենալը դարձել է օրինաչափություն․ ՊԵԿ-ը ահազանգում է
Հանրային սննդի ոլորտում գործունեություն իրականացնող տնտեսվարողների կողմից հսկիչ դրամարկղային կտրոն չտրամադրելը եւ չգրանցված աշխատողներ ունենալը, կարծես թե, դարձել է օրինաչափություն եւ վարքագծի փոփոխություն տեղի չի ունենում։ Այս մասին հայտնում են Պետական եկամուտների կոմիտեի մամուլի ծառայությունից։
Հանրային սննդի ոլորտի գործունեության հարկման համակարգի վերաբերյալ Պետական եկամուտների կոմիտեն տեղեկացնում է.
Օրենսդրական փոփոխությունների մասով.
ՀՀ հարկային օրենսգրքում հանրային սննդի ոլորտին վերաբերող փոփոխություններին ծանոթանալու համար բավարար ժամանակ եւ հնարավորություններ ընձեռված են եղել հարկ վճարողներին: Ընդ որում, կատարված փոփոխությունների նպատակն է հնարավորություն տալ հանրային սննդի ոլորտում գործունեություն իրականացնող հարկ վճարողներին հարկերը վճարել՝ ելնելով իրացման շրջանառություն ծավալից, որը կարծում ենք հարկման տեսանկյունից առավել արդարացի է, քանի որ նախկին կարգավորումներով ըստ էության նույն ելակետային տվյալներ ունեցող, սակայն տարբեր իրացման շրջանառություն ունեցող հարկ վճարողները վճարում էին նույն հարկի գումարը:
Վարչարարության մասով.
ՀՀ պետական եկամուտների կոմիտեն բազմիցս իրազեկման տարբեր գործիքների միջոցով (գրավոր ծանուցումների, հեռախոսազանգերի, հանդիպումների եւ այլն) մշտապես հորդորել է հարկ վճարողներին ամբողջությամբ եւ ժամանակին հաշվարկելու եւ վճարելու իրենց հարկերը, փաստաթղթավորել գործարքները, տպել հսկիչ դրամարկղային մեքենայի կտրոնները, չունենալ չգրանցված աշխատողներ, քանի որ նշված ռիսկերի առակայության պարագայում հարկային մարմնի արձագանքն անխուսափելի է: Ընդ որում, հանրային սննդի ոլորտում գործունեություն իրականացնող տնտեսվարող սուբյեկտների հետ վերջին հանդիպումը տեղի է ունեցել 25.01.2018թ. ժամը 11.00–ին ք. Երեւան, Ահարոնյան փող. 43 հասցեում գտնվող ՀՀ ՊԵԿ վարչական շենքի դահլիճում, որտեղ վերջիններիս ներկայացվել են ոլորտում առկա ռիսկերը եւ առաջարկվել փոխել վարքագիծը:
Սակայն՝ հանրային սննդի ոլորտում իրականացված վերլուծությունների արդյունքները ցույց են տվել, որ վերջիններիս կողմից հսկիչ դրամարկղային կտրոն չտրամադրելը եւ չգրանցված աշխատողներ ունենալը կարծես թե դարձել է օրինաչափություն եւ վարքագծի փոփոխություն տեղի չի ունենում, ինչի մասին են վկայում նաեւ այդ ոլորտում իրականացված ստուգումների եւ ուսումնասիրությունների արդյունքները:
Միաժամանակ հարկ է նշել, որ հարկային մարմինը հսկողական միջոցառումներն իրականացնում է իրեն վերապահված լիազորությունների շրջանակներում եւ ՀՀ հարկային օրենսդրությանը համապատասխան: