Հաջորդ զորակոչին «Ես եմ» ծրագրով բանակ կմեկնեն նաև Արցախից. Լևոն Մնացականյան

«Ես եմ» ծրագրով հաջորդ զորակոչին բանակ կմեկնեն նաեւ Արցախից։ Այս մասին այսօր՝ հուլիսի 24-ին, Ստեփանակերտում, լրագրողների հետ հանդիպման ժամանակ նշեց Արցախի պաշտպանության նախարար Լեւոն Մնացականյանը:

«Արցախում «Ես եմ» ծրագիրը ներկայացված է կառավարությանը, երբ Ազգային ժողովն արձակուրդից գա, նախագիծը կքննարկվի ու կընդունվի։ Կարծում եմ՝ արդեն հաջորդ զորակոչից սկսած զինծառայողները կարող են ծառայել նաև այդ ծրագրով»,-ասաց Արցախի պաշտպանության նախարարը:

Հիշեցնենք, որ 2017-ի ապրիլի 20-ին ՀՀ ՊՆ-ն «Ազգ-բանակ» հայեցակարգի ներքո շրջանառության մեջ դրեց «Ես եմ» ծրագիրը, որով այն նորակոչիկները, որոնք ցանկություն կհայտնեն ծառայությունն իրականացնել մարտական հերթապահություն իրականացնող զորամասում, իրավունք կստանան անցնելու ծառայության նոր տեսակի` ժամկետային-պայմանագրային:

Ծառայությունը կտևի 3 տարի, սակայն դրանցից գումարային 7 ամիս զինծառայողը կանցկացնի ազատարձակման մեջ` սկսած 6-րդ ամսվանից, երբ իր ստորաբաժանումը կստանձնի մարտական հերթապահությունը՝ յուրաքանչյուր ամիս ծառայելով 1+1+2 բանաձևով: Մեկ շաբաթ` արձակուրդում, մեկ շաբաթ` զորամասում, պատրաստվելով մարտական հերթապահության, ևերկու շաբաթ` առաջնագծում, մարտական հերթապահություն անցկացնելիս:

Այսպիսով, զորակոչվելուց հետո 5 ամիս ուսումնական փուլ անցնելով` նա կանցնի ծառայության, որի ընթացքում 31 ամսից 7-ը կանցկացնի տանը, իսկ 24-ը` զորամասում և մարտական դիրքերում: Յուրաքանչյուր անգամ արձակուրդ գնալիս նրան կվճարվի որոշակի գումար` արձակուրդային ծախսերը հոգալու համար:

Ծառայության ավարտին նրա անձնական հաշվին կփոխանցվի շուրջ 5 մլն ՀՀ դրամ, որը զորացրված զինծառայողը կկարողանա օգտագործել նպատակային երեք ծրագրերից մեկում` մատչելի բնակարան (սուբսիդավորված հիփոթեքային ծրագիր), մինի-ֆերմա(գյուղաբնակ զինծառայողների համար՝ փոքր ջերմոց կամ ֆերմա ստեղծելու կամ փոքր գյուղտեխնիկա ձեռք բերելու ծրագիր), ուսման վարձի փոխհատուցում: