Կամո Արեյանի կինն իրենից հարուստ է

Երևանի քաղաքապետի ժամանակավոր պաշտոնակատար Կամո Արեյանը, ով արդեն 15 տարի զբաղեցրել է քաղաքապետի առաջին տեղակալի պաշտոնը, զարմանալիորեն համեստ ունեցվածք ունի:

Ըստ նրա պաշտոնական հայտարարագրի` ունի մեկ բնակարան: Սեփական ավտոմեքենա չունի: Համենայնդեպս, հայտարարագրում չկա նշված: Որպես եկամուտ հայտարարագրել է միայն քաղաքապետարանից ստացված աշխատավարձը՝ ամսական 384 հազար դրամ: Նույնն է նաև դրամական միջոցների դեպքում: Հայտարարագրում ցույց է տվել փոքր գումարներ՝ 550 հազար դրամ:

Իսկ ահա նրա տիկինը` Արմենուհի Հարությունյանը, այնքան էլ աշխատավարձի հույսով չի ապրում: Նրա դրամական միջոցը կազմել է անցած տարեվերջին 350 հազար դրամ: Փոխարենը Արեյանի տիկինը անցած տարեվերջին ունեցել է 51 հազար 700 դոլարի չափով փոխառություն: Բացի այս, նա որպես եկամուտ հայտարարագրել է երկու վայրից ստացած աշխատավարձը` ամսական 152 հազար դրամ, տրված փոխառությունների դիմաց ստացված 122 դոլարը և մեկ ընկերությունից 7 մլն 920 հազար դրամի չափով ստացած շահաբաժինը: Բանն այն է, որ Արմենուհի Հարությունյանը մի քանի առևտրային կազմակերպություններում բաժնետեր է և ղեկավար: Ի դեպ, նրան է պատկանում զբոսաշրջության ոլորտում հայտնի «Արմանե Երկիր» ընկերությունը:

«Ժողովուրդ» օրաթերթը տեղեկացավ, որ այս ընկերությունը սոցփաթեթի շրջանակներում պետական հատվածում աշխատողներին ծառայություններ է մատուցել: Մեկ այլ ընկերություն էլ է կապվում Արմենուհի Հարությունյանի հետ: Խոսքը «Մոդդ Իվենս»-ի մասին է, որի բաժնեմասի մեծ մասը պատկանում է նրա քրոջը` Շուշանիկ Հարությունյանին: 

Մանրամասն՝ այստեղ: