Պարոնայք, 20-25 տարի համայնք եք ղեկավարում, ի՞նչ եք արել այսքան ժամանակ. Կոտայքի մարզպետ
Ինչով է պայմանավորված, որ վերջին շրջանում Կոտայքի մարզի շուրջ մեկ տասնյակ համայնքների ղեկավարներ և վարչական ղեկավարներ հրաժարականների դիմումներ են ներկայացրել: Այս հարցի շուրջ NEWS.am-ը զրուցել է մարզպետ Ռոմանոս Պետրոսյանի հետ:
«Դա ես պայմանավորում եմ նրանով, որ Սահմանադրությամբ և օրենքով ինձ վերապահված համապատասխան լիազորությունների շրջանակներում այցեր եմ կատարում համայնքներ, համայնքների ղեկավարների եմ հրավիրում աշխատանքային հանդիպումների: Քանի որ օրենսդրությունը նշում է, որ մարզի տարածքում և համայնքներում մարզպետներն իրականացնում են իրավական և մասնագիտական հսկողություն, այդ հսկողության շրջանակներում ես, բնականաբար, հետաքքրվում եմ գյուղերում առկա խնդիրներով, միջին վիճակագրական քաղաքացու կյանքի որակի վրա ազդեցություն ունեցող այն երևույթներով, որոնք այսօր ունենք մեր համայնքներում»,-ասաց մարզպետը՝ հավելելով, որ կան համայնքներ, որտեղ գյուղապետերը 20, 25 նույնիսկ 30 տարի գյուղապետի պաշտոն են զբաղեցրել, բայց այդ գյուղերում կյանքի պայմաններ չեն ապահովել գյուղացիների համար:
«Քարուքանդ ճանապարհներ, վատթար վիճակում գտնվող գյուղի ոռոգման և խմելու ջրի ցանց, կան տեղեր, որ նույնիսկ բացակայում է այդ ցանցը, ինչպես նաև կիսախարխուլ մշակույթի տուն կամ մանկապարտեզ, կամ ընդհանրապես չունեն մանկապարտեզ:
ՏԻՄ օրենքով համայնքներին վերապահված է նախադպրոցական կրթության ապահովման անհրաժեշտությունը, մշակութային դաստիարակության ապահովման անհրաժեշտությունը, և ես, բնականաբար, հարց եմ տալիս համայնքների ղեկավարներին՝ պարոնայք, 20-25 տարի ղեկավարում եք համայնքներ, ի՞նչ եք արել այդ տարիների ընթացքում, որ մանկապարտեզ կամ մշակույթի տուն գոյություն չունի, կամ ահավոր վիճակում է գտնվում»,-ասաց մարզպետը:
Ռոմանոս Պետրոսյանը կարծում է, որ այս նոր գործելաոճի մեջ չեն տեղավորվում շատ համայնքների ղեկավարներ, բարեփոխումների մեջ իրենց չեն տեսնում և իրենց քայլն են անում՝ տեղը զիջելով ավելի երիտասարդ գործիչների:
Անդրադառնալով մամուլում տեղ գտած տեղեկություններին, թե ինքը կարգադրել է որոշ համայնքների ղեկավարների հրաժարականներ տալ, ապա ասել, որ ոչ մի տեղ չխոսեն դրա մասին, այլապես իրենց համար վատ կլինի, Ռոմանոս Պետրոսյանը պատասխանեց. «Դա իմ աշխատելաոճը չէ, դա իմ բառապաշարը չէ: Ես ինքս իմ լիազորությունները իրացնում եմ բացառապես օրենքի տառին և սահմանադրության ոգուն համապատասխան, ես օրենքից դուրս ոչինչ չեմ անում, ինչպես նաև իմ արժեհամակարգում չկա նման բան, որ ինչ-որ բան ասեմ, ինչ-որ բան դրդեմ, ապա նաև խնդրեմ, որ այդ մասին չխոսեն»:
Նա ընդգծեց, որ քաղաքականությունը վարում է շատ բաց և թափանցիկ. «Ես միշտ խոսում եմ այն, ինչը կխոսեի հանրայնորեն, ես երբևէ փակ և ծածուկ գործունեություն չեմ վարում, իմ գործունեությունը բաց և թափանցիկ է, ինչի ականատեսը մեր հանրությունն է, նման ձևակերպումներ ես բացառում եմ, որ տված լինեմ կամ երբևէ կտամ»:-նշել է Կոտայքի մարզպետը: