Այն ինչ կկատարվի Հայաստանի հետ՝ լինի հաջողություն, թե ձախողում, դա չի լինի միայն մեր քաղաքական թիմի հաջողությունը կամ ձախողումը. Արարատ Միրզոյան
Յուրաքանչյուր հայ պետք է գիտակցի Հայաստանի առջև բացված եզակի հնարավորությունը: Այս մասին, ԱՄՆ կատարած իր այցի ժամաակ հայտարարել է Հայաստանի առաջին փոխվարչապետ Արարատ Միրզոյանը:
Փոխվարչապետ Միրզոյանն ասել է. «Երևանում, կառավարությունում, թե որևէ մասնավոր տանը, թե Վաշինգթոնում, թե Փարիզում, թե Տոկիոյում որտեղ հայ կա, մենք պետք է բոլորս քաջ գիտակցենք և հսկայական պատասխանատվություն ունենանք այն հնարավորություն համար, որը ստեղծվել է Հայաստանի համար: Ես վստահ եմ՝ գերագնահատած չեմ լինի, եթե ասեմ՝ բացառիկ հնարավորություն ունենք հայ ազգի զարգացումն ապահովելու համար՝ Հայաստանում ու սփյուռքում»:
Միրզոյանի խոսքով, Հայաստանի զարգացման համար կառավարությունն ակնկալում է առաջին հերթին քաղաքացիների, բայց նաև բոլոր հայերի աջակցությունը՝ Տոկիոյից մինչև Գլենդել:
«Արարատ Միրզոյանի այցը շատ հաջող էր և անցավ հայ-ամերիկյան հարաբերությունների համար չափազանց կարևոր պահի» -ասել է Հայ դատի Վաշինգթոնի գրասենյակի ղեկավար Արամ Համբարյանը:
Ամերիկայի հայկական համագումարի Վաշինգթոնի ներկայացուցչությունը ղեկավար Բրայար Արդունին նշել է, որ այցը օգնեց ամրապնդել ինչպես Հայաստան - ԱՄՆ, այնպես էլ Հայաստան-Սփյուռք հարաբերությունները:
Արարատ Միրզոյանը նշել է, որ Վաշինգթոնում իր հանդիպումների ընթացքում ամերիկյան օրենսդիր ու գործադիր իշխանության ներկայացուցիչներին պարզ հաղորդագրություն է փոխանցել. «Այն ինչ կկատարվի Հայաստանի հետ՝ լինի հաջողություն, թե ձախողում, դա չի լինի միայն մեր քաղաքական թիմի հաջողությունը կամ ձախողումը, նաև չի լինի միայն Հայաստանի հաջողությունը կամ ձախողումը:
Դա լինելու ժողովրդավարության եւ ժողովրդավարական արժեքները փորձաքննությունը, հաջողությունը կամ ձախողումն աշխարհում: Բոլոր այն վարչակազմերը, որոնք հավատալով կամ ոչ հռչակում են իրենց ժողովրդավարության պաշտպան, չունեն այլ այլընտրանք, քան կանգնել ՀՀ նոր կառավարության կողքին ու պաշտպանել ժողովրդավարությունը Հայաստանում»:
Վաշինգթոնում Համաշխարհային բանկում աշխատող Տիգրան Փարվանյանը, ով նախկինում բողոքի ակցիաների է մասնակցել ՀՀ դեսպանատան առջև, ՀՀ առաջին փոխվարչապետին նշել է, որ Արարատ Միրզոյանին առաջարկել է մեխանիզմներ մշակել, որոնք թույլ կտային արտերկրում աշխատող հայ մասնագետներին իրենց գիտելիքները ներդնել Հայաստանի զարգացման մեջ: