110 մլն եվրոն սպասում է «սառնարանում», և դրա օգտագործումը կախված է միայն ՀՀ-ից. Պ. Սվիտալսկի
Պատասխանելով լրագրողի հարցին, թե լսե՞լ է Նիկոլ Փաշինյանի հայտարարությունը՝ ԵՄ-ից ֆինանսական աջակցություն ստանալու ակնկալիքների մասին, արդյո՞ք այդ թեմայի շուրջ խոսվել է իր այստեղ այցի ժամանակ‚ Եվրոպական հանձնաժողովի Հարևանության և ընդլայնման շուրջ բանակցությունների հարցերով գլխավոր տնօրենի տեղակալ Կատարինա Մատերնովան նշել է‚ որ Հայաստանի վարչապետ Նիկոլ Փաշինյանի հայտարարությունը հուշել է իրենց , որ վերանայեն իրենց թվերը, մոբիլիզացնենք իրենք իրենց՝ հասկանալու, թե ընդհանուր թվով ինչքան են ֆինանսական աջակցություն տրամադրել Հայաստանին:
Կատարինա Մատերնովայի խոսքով՝ իրենց գործի բարդությունն էլ հենց այն է, որ պետք է անընդհատ բացատրական աշխատանքներ տանեն: Նա նշեց, որ հիմա էլ Հայաստանում է, որ կառավարության հետ քննարկի և բացատրի, թե ինչպես են իրենք աշխատում և ներկայացնի, թե Հայաստանին մինչ հեղափոխությունն ինչ ֆինանսավորում է տրամադրվել և ինչի համար աջակցություն չի տրամադրվել:
«Կարծում եմ՝ տարբեր հայտարարությունների հիման վրա բացատրությունների տեղ կա ու պարզաբանելու ինչ-որ թյուրընկալումներ, որոնք միգուցե կան, որովհետև թվերը կարող են շփոթեցնող լինել, եթե նայվի աջակցության միայն մեկ մեխանիզմին, եթե ամբողջ պատկերը չուսումնասիրվի»,- ասաց նա՝ նշելով, որ դա վերաբերում է ոչ միայն Հայաստանին, այլ երկրներում ևս անհրաժեշտություն լինում է։
Ասուլիսին ներկա Հայաստանում Եվրամիության պատվիրակության ղեկավար Պյոտր Սվիտալսկին էլ ուշադրություն հրավիրեց Եվրամիության կողմից տրամադրված ֆինանսական աջակցությունից 110 միլիոն եվրոն անցած տարիներին չօգտագործելու հանգամանքի վրա:
«Սա այն գումարն է, որը Հայաստանը պետք է ակտիվացնի. արդյո՞ք այդ գումարը պետք է ձեզ: Ես գտնում եմ, որ դրա մեծ մասն անհրաժեշտ է նաև դրամաշնորհների իրականացման համար, որոնց պայմանագրերը վերակնքվել են, բայց չեն իրագործվել: Որոշ պայմանագրերի իրագործումը չի էլ սկսվել: Կարծում եմ՝ սա շատ կարևոր է: Նախքան խոսելը նոր փող ստանալու մասին, որն իհարկե լինելու է, նաև պետք է հետադարձ հայացք գցել: 110 միլիոն եվրոն սպասում է, սպասում է «սառնարանում» և դրա օգտագործումը կախված է միայն Հայաստանից»,- ասաց նա: