Հնարավո՞ր է վատ լուսանկարի պատճառով փոխել անձնագիրը՝ ժամանակից շուտ
ՀՀ ոստիկանության անձնագրային և վիզաների վարչության պետ Մնացական Բիչախչյանը այսօր ուղիղ եթերի ժամանակ պատասխանեց քաղաքացիներին հուզով հարցերին:
Հարցին, թե նարավո՞ր է ժամկետի մեջ եղած անձնագիրը փոխել ավելի շուտ, քանի որ այն վաղուցվա է և, չնայած արտաքին վնասվածքներ չունի, բայց անձի այնտեղ փակցված լուսանկարը իր ներկայիս տեսքին նման չէ և երբեմն նույնականացման խնդիր է առաջանում, Բիչախյանը պատասխանեց.
«Անձնագիրը կարող եք փոխանակել, անձնագրի փոխանակման համար սահմանված է իրավական հնարավորություն, եթե այն անձի համար դառնում է օգտագործման համար ոչ պիտանի: Օգտագործման համար ոչ պիտանի է նաև, եթե անձնագրով հնարավոր չէ նույնականացնել անձի ինքնությունը իր անձնագրում ամրագրված լուսանկարով»,- նշեց Բիչախչյանը:
Նա նաև ընդգծեց, որ անձնագիր ստանալիս չի թույլատրվում ներկայացնել 6 ամսից ավելի վաղեմության լուսանկար. «Պրակտիկայում լինում են նաև դեպքեր, երբ անձը 5 կամ 6 տարի առաջ ստացել է անձնագիր և դիմում է անձնագրային ծառայություն նոր անձնագիր ստանալու համար, իր հետ ներկայացնելով նույն այն լուսանկարը, որն ամրագրված է իր 5-6 կամ 10 տարի առաջ ստացած անձնագրում:
Այստեղ տեղեկացնենք, որ գոյություն ունեն Քաղաքացիական ավիացիայի միջազգային կազմակերպության ստանդարտներ, որին միացել է նաև Հայաստանի Հանրապետությունը, և չի թույլատրվում անձը հաստատող փաստաթուղթ՝ անձնագիր ստանալուց վեց ամսից ավելի վաղեմության ժամկետով լուսանկար ներկայացնել: Այս պարագայում եթե քաղաքացիները ներկայանում են անձնագրային ծառայություն և պնդում, որ իրենց 10 տարի առաջվա լուսանկարը, որը ներկայացվել է անձնագրային ծառայություն, դրանով տալ իրենց անձնագիր… նույնիսկ շատ դեպքերում պատճառաբանելով, որ այդ լուսանկարն իրենց ամենահաջող լուսանկարն է, ապա կարող եք իրազեկել, որ այս պարագայում հնարավոր չէ տրամադրել այդ լուսանկարով տվյալ փաստաթուղթը»: