Արսեն Թորոսյանը՝ «Սանիթեք»- ի հետ կապված բողոքների և սանիտարահամաճարակային իրավիճակի մասին
Առողջապահության նախարար Արսեն Թորոսյանը, անդրադառնալով «Սանիթեքի» հետ կապված բողոքներին և հնարավոր սանիտարահամաճարակային իրավիճակին, նշեց. «Մենք ահազանգեր ստանում ենք թե՛ հենց բնակիչներից, թե՛ քաղաքապետարանից: Մոտ երեք օր առաջ էր, որ Նոր Նորքի շրջանում խնդիրներ կային»:
«Սանիթեքի» հետ կապված խնդիրը, նախարարի խոսքով՝ նրանց ներկայացմամբ՝ կապված է մեքենաների անսարքության հետ է. «Մենք մեր գործառույթների շրջանակներում հայտնաբերում ենք ամենավատ տեղերը և կոչ ենք անում քաղաքային իշխանություններին լուծել: Վերջին անգամ Կամո Արեյանի միջամտությամբ այլ մեքենաներ են ներգրավվել Նոր նորքում այդ հարցը լուծելու համար, այսինքն՝ «Սանիթեքից» դուրս ու նաև վարչական շրջանների ղեկավարների հետ ենք աշխատում»:
Իսկ սանիտարահամաճարակային վիճակը, Արսեն Թորոսյանի պնդմամբ՝ այս պահին կայուն է. «Որևէ տեղ որևէ հիվանդության բռնկում չունենք: Էպիզոդիկ դեպքեր կան թե՛ Երևանում, թե՛ այստեղից դուրս, բայց բռնկումներ և համաճարակներ չկան, վիճակը վերահսկելի է»: