ԵՄ -ն բարեփոխումներ է ակնկալում կալանավայրերում
«ԵՄ-ի ակնկալիքները հետևյալն են. ուզում ենք, որ ՀՀ Մարդու իրավունքների պաշտպանը և նրա աշխատակազմն ավելի ուժեղ կատարեն իրենց դերը՝ որպես ազգային կանխարգելիչ մեխանիզմ և ունենան ավելի բարձր ձայն, իսկ քաղաքացիական հասարակությունը լրացնի նրանց՝ ավելի լրջորեն մասնակցելով ՔԿՀ-ներում մշտադիտարկումների աշխատանքներին»,-ՔԿՀ-ներում մարդու իրավունքների պաշտպանությանը նվիրված աշխատաժողովում այսօր հայտարարեց ՀՀ-ում Եվրոպական միության պատվիրակության ղեկավար, դեսպան Պյոտր Անտոնի Սվիտալսկին:
Նա գովաբանեց հայաստանյան հ/կ-ների աշխատանքը. «Տպավորվել եմ նրանց մասնագիտական ուսումնասիրությունների մակարդակով: Նրանք լուրջ աշխատանք են կատարել ՔԿՀ-ներում առկա իրավիճակի շուրջ: Հաշվի առնելով երկրում առկա նոր վիճակը՝ ակնկալում ենք այս ոլորտում բարեփոխումներ»:
Դեսպանի բնորոշմամբ՝ ՔԿՀ-ներում մարդու իրավունքների առնչությամբ ՄԻՊ-ի առաջարկներն ավելի արդյունավետ պետք է գործարկվեն. «Հինգ տարի առաջ, օրինակ, իրավիճակը ճնշող էր. հիմա ակնկալում ենք, որ իշխանության կողմից ՄԻՊ-ի առաջարկներն ավելի լուրջ կիրականացվեն:
Մենք նախորդ, ինչպես և ՀՀ նոր կառավարության հետ քննարկումներ ենք ունեցել. լուրջ ընկալում կա, որ ՀՀ-ում որ պետք է իրականացնել խորը և կառուցվածքային բարեփոխումներ: Վստահ եմ, որ դրանք կյանքի կկոչվեն»: Ապա Պյոտր Սվիտալսկին վստահեցրեց, որ ԵՄ-ի համար կարևոր է ՀՀ-ի և Վրաստանի ՄԻՊ-երի գործակցությունը(Վրաստանի Հանրային պաշտպանն աշխատանքային այցով Երևանում է). «Ակնկալում ենք, որ նրանք կփոխանակվեն փորձով ավելի հաճախ: ԵՄ-ն խթանում է նման կապերը, որոնք օգտակար են երկու երկրների համար»: