Ասում են՝ 1-2 ամիս կանցնի, և կմոռանան, կսկսեն կոռուպցիոն սխեմաներ գործել. Նիկոլ Փաշինյան

Վարչապետ Նիկոլ Փաշինյանը ֆեյսբուքյան ուղիղ եթերում նշել է, որ աշխատանքի շուկայում պահանջներն անընդհատ մեծանում են, այլ խնդիր է, թե պետական համակարգում արդյոք ամենաարժանիներն են ստանում աշխատանք, թե ոչ:

Մասնավորապես, օգտատերերից մեկը բարձրացրել էր այն հարցը, որ հաճախ մինչև 30-35 տարեկան անձանց են հրավիրում աշխատանքի:

Վարչապետն ընդգծեց, որ կա այդ խնդիրը, և՛ դա, և՛ գործազրկությունը մի գործողությամբ հնարավոր չի լուծել, մի քանի շթղայական գործողություններ պիտի լինեն: Այդ շղթայի մեջ առաջին հերթին վարչապետն ընդգծեց հետևյալը.

«Պետական մակարդակով կադրային բանկ ստեղծելու նպատակ կա, որտեղ աշխարհի յուրաքանչյուր ծայրերից յուրաքանչյուր քաղաքացի, ով հայերենի է տիրապետում, կարող է իր հավակնությունները ներկայացնել այդ հարթակին, իսկ նա էլ կֆիլտրի ու կփորձի կառավարությանը ներկայացնել լավագույններին»:

«Կան մարդիկ, ովքեր ասում են, որ 1-2 ամիս կանցնի և կմոռանան՝ ինչի մասին էր այս ամենը, ինչի համար, կսկսեն փող աշխատել, կոռուպցիոն սխեմաներ կլինեն: Պետական համակարգում էլ կան մարդիկ, ովքեր հույսեր չեն ներշնչում, և մենք պետք է հնարավորինս արագ կադրային հեղափոխության համար հստակ կադրային բանկ ունենանք և կարողանանք մեկ օրում այդ հեղափոխությունն անցկացնել»,-ասաց Փաշինյանը:

Ըստ նրա՝ յուրաքանչյուրի ինտելեկտուալ ու պրոֆեսիոնալ մակարդակը պիտի բարձրացվի:

«Հայաստանում կա ոլորտ, ավելի միշտ 4000-ից ավել թափուր աշխատատեղ կա, և դա ինֆորմացիոն տեղեկատվական տեխնոլոգիաների ոլորտն է»,-ասաց նա՝ հրավիրելով այս ոլորտում աշխատանքի: