ԱԻՆ նախկին աշխատակիցը կրակմարիչներ է հափշտակել դպրոցներից և մանկապարտեզներից (տեսանյութ)

Հունիսի 29-ին Երևանի Նոր Նորք վարչական շրջանի դպրոցներից մեկի տնօրենը դիմել է ոստիկանություն և հայտնել, որ հունիսի 27-ին դպրոց է եկել ոմն Բաբկեն Մարգարյան և ներկայանալով ԱԻՆ աշխատակից, իր հետ տարել է 5 կրակմարիչները: Նա պատճառաբանել է, որ դրանք լիցքավորման կարիք ունեն։

Ոստիկանության մամուլի ծառայությունից հայտնում են, որ դպրոցին պատճառվել է շուրջ 100 հազար դրամի վնաս։

Հետաքննության արդյունքում պարզվել է, որ նույն անձը նույն վարչական շրջանի մեկ այլ դպրոցից 3 հատ կրակմարիչ է տարել՝ ասելով, որ իբր, ԱԻ նախարարի հրամանով իրենք անվճար լիցքավորում են դպրոցների ու մանկապարտեզների կրակմարիչները: Այս սդեպքւմ վնասը կազմել է 60 հազար դրամ:

Խաբեություն կատարելու կասկածանքով ոստիկանություն բերման է ենթարկել ԱԻՆ նախկին աշխատակից 40-ամյա Արման Մարգարյանը, որը խոստովանել է կատարած հանցանքը և ասել, որ նույն եղանակով Ավան և Նոր Նորք վարչական շրջանների այլ դպրոցներից և մանկապարտեզներից ևս հափշտակել է կրակմարիչներ։ Նա կրակմարիչներ է տարել 9 դպրոցից և 10 մանկապարտեզից: