Տարոն Մարգարյանն ավելի շուտ է ցանկացել հրաժարական տալ, Սերժ Սարգսյանը չի թողել

Երևանի ՀՀԿ-ական քաղաքապետ Տարոն Մարգարյանը հուլիսի 9-ին, ի վերջո հրաժարական տվեց: ՀՀԿ-ական էլիտայի մի մասի համար սա անակնկալ է եղել: Շատերը նախապես չեն իմացել նրա հրաժարականի մասին, քանի որ նրանց վերջին տեղեկությունները նրա պաշտոնավարման մասին եղել են այն, որ Սերժ Սարգսյանը Տարոն Մարգարյանին հորդորել է մինչև վերջ «աթոռին կպած» մնալ:

Երեկ ԱԺ-ում, հոգով և սրտով դեռ ՀՀԿ-ական համարվող մի քանի պատգամավոր «Հայկական ժամանակ»-ի հետ մասնավոր զրույցում փոխանցեցին, որ Տարոն Մարգարյանը հրաժարական տալու ցանկություն ունեցել է դեռ այն ժամանակ, երբ Նիկոլ Փաշինյանը վարչապետ է ընտրվել, սակայն նրան այդ քայլին գնալ չի թողել Սերժ Սարգսյանը: Դրանից հետո մինչև այն խոսակցությունների ժամանակահատվածը, թե՝ Մարգարյանը դիմում է գրել և պատրաստվում է հրապարակել, թեժ քննարկումներ են եղել նրա ու ՀՀԿ-ականների միջև՝ քաղաքապետի պաշտոնից հեռանալ-չհեռանալու շուրջ: Քննարկումները եղել են Սերժ Սարգսյանի հորդորով:

Պատճառն այն է, որ Տարոն Մարգարյանը Երևանում լուրջ ձևավորված թիմ ուներ, որով կարողացել է այս տարիների ընթացքում ընտրությունների ժամանակ քաղաքացիների քվեներն ուղղորդել ՀՀԿ: Կուսակցությունում հույս են ունեցել, որ Ազգային ժողովի արտահերթ ընտրություններն անցկացնելուց հետո միայն նոր կառավարությունը կզբաղվի Երևանի քաղաքապետի պաշտոնով: Այս փաստը ՀՀԿ-ի համար ինչ-որ չափով հույս է եղել, որ կկարողանան ընտրություններում հաղթահարել գոնե 10-15 տոկոսի շեմը:

Հանրապետական պատգամավորներից հետաքրքրվեցինք, թե ինչն էր պատճառը, որ Տարոն Մարգարյանը շտապ ցանկանում էր հրաժարական տալ և հեռանալ: Մեր զրուցակիցները նշեցին՝ պատճառը եղել է ԱԱԾ վերջին բացահայտումները, որոնք կապված են եղել «Երևան» հիմնադրամի յուրացումների հետ: Այսինքն՝ Տարոն Մարգարյանը ցանկացել է իրերը հավաքել և օր առաջ հեռանալ, որպեսզի հանրության աչքի առաջ չլինի և իրավապահների ուշադրության կենտրոնում չհայտնվի: Սակայն ստացվում է, որ սեփական կուսակցությունը նրան «փուռը» տվեց:

Մեկ այլ աղբյուրից էլ տեղեկություն ստացանք, որ Տարոն Մարգարյանի հրաժարականի դիմումը մեկ շաբաթից ավելի «սպասողական վիճակում» է եղել տարածքային կառավարման և զարգացման նախարար Սուրեն Պապիկյանի մոտ: Վարչապետ Նիկոլ Փաշինյանն այն չի շտապել հաստատել: Ի դեպ, մոտ մեկ ամիս առաջ լրագրողների հարցին ի պատասխան ասել էր, որ, եթե անհրաժեշտություն լինի, նա կհորդորի և Տարոն Մարգարյանը հրաժարական կտա:

Հանրապետական պատգամավորներից մեկը, մեր այն հարցին՝ ՀՀԿ-ն քաղաքապետի պաշտոնում թեկնածու առաջադրելո՞ւ է, պատասխանեց. «Հանրապետական կուսակցություն էլ կա՞ որ, այն արդեն փլուզվել է»:

Հանրապետականի պաշտոնական դիրքորոշումն այս հարցի շուրջ դեռ պարզ չէ: ԱԺ ՀՀԿ խմբակցության ղեկավար Վահրամ Բաղդասարյանը նշեց, որ այս հարցով քննարկում դեռևս չեն ունեցել:

«Մենք նման քննարկում չենք ունեցել, համբերեք, կքննարկենք, դրա մասին լրացուցիչ ձեզ կհաղորդենք»,- ասաց նա:

Հարցին` ի՞նչը կարող է խոչընդոտել, որ չառաջադրեք, Բաղդասարյանը պատասխանեց.

«Կշարժվենք օրենքով, ո՞վ է ասում, որ հայտարարում ենք` առաջադրում ենք կամ չենք առաջադրում, չենք քննարկել»:

Հարցին էլ` իմաստ ունի՞, որ ՀՀԿ-ն թեկնածու առաջադրի, երբ հանրության համակրանքը ՔՊ-ի կողմն է, նա արձագանքեց. «Քաղաքացիական պայմանագիրը ավագանիում մեծամասնություն ունի՞»:

ՀՀԿ-ականներից մեկը, որը միջանցքում լսել էր լրագրողներին տված Բաղդասարյանի այն պատասխանը, թե՝ ՔՊ-ն մեծամասնություն չունի ԱԺ-ում, օրվա ավարտին մեր զրույցում փոխանցեց, որ թեկնածու չեն առաջադրելու: Պատճառների մասին էլ նշեց՝ ի՞նչ տարբերություն, եթե ՀՀԿ-ական է լինելու քաղաքապետը, ապա Տարոն Մարգարյանը կմնար:

ՏԻՄ օրենքի համաձայն՝ Երևանի ավագանին իր անդամներից որևէ մեկին քաղաքապետ կարող է ընտրել 73 օրվա ընթացքում: Սակայն տեղեկություններ կան, որ Կամո Արեյանը Երևանի քաղաքապետի պաշտոնակատարի կարգավիճակում կարող է մնալ մինչև հոկտեմբեր: Այդ ժամանակահատվածում էլ տեղի կունենան նոր ընտրությունները: Այսինքն, բանը չի հասնելու նրան, որ ավագանին փորձի իր կազմից որևէ մեկին նոր քաղաքապետ ընտրի: Մեր այս տեղեկութունն՝ ըստ էության, հաստատեց նաև ՔՊ վարչության անդամ Ալեն Սիմոնյանը:

«Ճիշտ տրամաբանությունն այն է, որ նոր ընտրություններ տեղի ունենան, որովհետև Երևանում մենք կունենանք մի իրավիճակ, ինչն ունենք Ազգային ժողովում: Այն է, որ ԱԺ-ում մեծամասնությունն ընդդիմություն է՝ ՀՀԿ-ն և այն անհատ պատգամավորները, որոնք դուրս են եկել ՀՀԿ-ից: Նույն իրավիճակն էլ պահել քաղաքապետարանում, կարծում եմ, որ սխալ է: Ճիշտ կլինի, որ նոր ընտրություններ լինեն, կարծում եմ, որ իրադարձություններն այդպես էլ կզարգանան: Տարոն Մարգարյանի հրաժարականից հետո չեմ կարծում, որ ՀՀԿ-ն կունենա այն թեկնածուին, որը մեծամասնության քվեն կստանա»,- ասաց Ալեն Սիմոնյանը:

Արդեն պարզ է, որ Երևանի քաղաքապետի պաշտոնը ևս բաժին է հասնելու Քաղաքացիական պայմանագիր կուսակցությանը: Նախնական տեղեկությունների համաձայն՝ ՔՊ կուսակցության նեղ շրջանակում քննարկում է եղել, որ այդ պաշտոնը զբաղեցնելու է Արարատ Միրզոյանը, որը հիմա առաջին փոխվարչապետի պաշտոնն է զբաղեցնում:

Արարատ Միրզոյանը ՀԺ-ի հարցին՝ կուսակցության ներսում քննարկվե՞լ է առաջիկայում իր քաղաքապետ դառնալու հարցը, բացասական պատասխան տվեց:

Բանն այն է, որ փոխվարչապետի պաշտոնը 2015 թվականի Սահմանադրական փոփոխություններով նախատեսված չի եղել: Սակայն Սերժ Սարգսյանն այս պաշտոնը «սղացրեց» Կարեն Կարապետյանի սիրտը չկոտրելու համար: Ու քանի որ այդ պաշտոնն արդեն կար, դրա համար այն զբաղեցրեց Միրզոյանը: Շուտով այս պաշտոնը այլևս չի լինի, քանի որ սուպերվարչապետական համակարգի «լուծարումից» հետո վարչապետն այլևս առաջին տեղակալ չի ունենա:

Այնուհանդերձ, նշենք, որ առաջին փոխվարչապետը, որպես այդպիսին, որևէ գործառույթ չի իրականացնում: Նախկին փոխվարչապետերից Վաչե Գաբրիելյանը ՀԺ-ին դեռ ամիսներ առաջ ասել էր, որ նրա պարտականությունը վարչապետի բացակայության ընթացքում վերջինիս փոխարինելն է: Սակայն գործնականում տեսնում ենք, որ Միրզոյանին այդ պարտականությունը չի վստահվում: Մասնավորապես, կառավարության նիստը, որը պետք է տեղի ունենար հուլիսի 12-ին՝ հինգշաբթի օրը, տեղափոխվեց, քանի որ վարչապետն այդ օրը լինելու է Բրյուսելում: