Կամո Արեյանի առաջարկը չընդունեց «Ելք» խմբակցությունը. պահանջեցին ընդմիջում

Փոխքաղաքապետ Կամո Արեյանը նիստի  վարման ժամանակ առաջարկեց  քաղաքապետի ընտրության օրը նշանակել հուլիսի 16-ին, սակայն «Ելք» -ը համաձայնվեց  առաջարկին:

Երևանի ավագանու «Ելք» խմբակցության ղեկավար Դավիթ Խաժակյանը հայտարարությունից հետո արտահերթ ելույթով հանդես եկավ և իր հերթին առաջարկեց քաղաքապետի արտահերթ ընտրության օր նշանակել 2018 թ․-ի օգոստոսի 8-ը։

«Ձեր նշածով արտահերթ ընտրություններն այդքան շուտ են լինելու, որ ընտրական գործընթացի կազմակերպման տեսանկյունից խնդիրներ են առաջանալու։ Եթե հուլիսի 16-ին քաղաքապետ չընտրվի, Երևանի ավագանու արտահերթ ընտրությունները օգոստոսին են լինելու, իսկ այդ ժամանակ պայմանները չափազանց դժվար են լինելու՝ քարոզարշավների կազմակերպման, տպարանների, դպրոցների հետ կապված խնդիրներ կարող են լինել։ Եվ այստեղ ամենամեծ վնասն այն է, որ ընտրությունների խոչընդոտները հաղթահարվելու են լրացուցիչ և մեծ գումարների հատկացմամբ։ Սա սաբոտաժ է պետության դեմ, ոչ թե «Ելքի» դեմ, այլ պետության դեմ»,- նշեց Խաժակյանը։

Կամո Արեյանն ընդունեց «Ելք» խմբակցության առաջարկությունը և ավագանու 46 անդամների կողմից քվեարկվելու հուլիսի 16-ին և օգոստոսի 8-ին քաղաքապետի արտահերթ ընտրության օրը նշանակելու հարցը։

Դրանից հետո՝ օգտվելով օրենքով իրենց վերապահված իրավունքից, «Ելք» խմբակցության ղեկավարը 15 րոպե ընդմիջում վերցրեց։

Ընդմիջմանը պատասխանելով լրագրողների այն հարցին, ինչու եք այդքան համոզված, որ քաղաքապետի ընտրությունը տապալվելու է, և նոր արտահերթ ընտրություններ են նշանակվելու, Դ․ Խաժակյանը պատասխանեց․ «Եթե «Հանրապետականն» իր կազմից քաղաքապետ ընտրի, կնշանակի, որ իրենք որոշել են իրենց վիճակը բարդացնել»։

Հիշեցնենք, որ Երևանի քաղաքապետ Տարոն Մարգարյանը հուլիսի 9-ին հրաժարական է տվել։

Ըստ Երևանի մասին օրենքի՝ քաղաքապետի պաշտոնը թափուր մնալուց հետո երրորդ աշխատանքային օրը օրենքի ուժով հրավիրվում է ավագանու նիստ, որում որոշվում է քաղաքապետի արտահերթ ընտրության օրը։ Քաղաքապետի ընտրության օրը պետք է լինի առավելագույնը մեկ ամսում, տվյալ դեպքում՝ մինչև օգոստոսի 12-ը։

Արտահերթ ընտրությունների ժամանակ քաղաքապետի թեկնածուներ առաջադրելու իրավունք ունեն ավագանու խմբակցությունները: