Գնալու եմ ՀՔԾ և ասեմ, որ ինձ ոչ ոք չի ծեծել. Վյաչեսլավ Հարությունով (տեսանյութ)
«Ինձ ոչ մեկ չի ծեծել, ես հո հավի ճուտ չեմ, որ ինձ ծեծեն», -այս մասին այսօր լրագրողների հետ զրույցում ասել է Վյաչեսլավ Հարությունովը՝ հերքելով վերջին օրերին շրջանառվող այն տեղեկությունը, թե ԱԺ պատգամավոր Գագիկ Ծառուկյանի և իր միջև ընդհարում է տեղի ունեցել և Ծառուկյանի թիկնազորի պետը՝ Էդուարդ Բաբայանը հարվածել է նրան:
Հարությունովի խոսքով՝ նա ասել է, թե ոչ թե Ծառուկյանն է մեղավոր, որ ինքը հիվանդանոցում է հայտնվել, այլ նա ասել է. «Որ ասում եմ՝ Գագոն մեղավոր ա, դա չի նշանակում, որ իմ հիվանդանոց ընկնելու համար ա Գագոն մեղավոր: Գագոն մեղավոր ա, որ իմ երեխեն ռոզիսկում ա»,- ասաց նա: Վյաչեսլավի խոսքով՝ նա Գագիկ Ծառուկյանից նեղացած է, որովհետև իր որդին այժմ Մոսկվայում է, իսկ նրա ընտանիքը՝ Երևանում. որդին հեռու է իր ընտանիքից, սա է նրա հիմնական խնդիրը:
«Հլը մի հատ Գագոյի ապրածը նայեք, նրա ով լինելը նայեք, նա իրեն թույլ կտա՞ մարդու վրա ձեռք բարձրացնի»,- ասում է նա:
Զրույցի ընթացքում Վյաչեսլավը ասաց, որ Արցախյան ազատամարտի տարիներին վիրավորվել է և կոնտուզիա ստացել, նա չի բացառում, որ հիվանդանոցում կարող է ասել է որոշ բաներ, որոնք իրականությանը չեն համապատասխանում «Կոնտուզիան այնպիսի հիվանդություն է, որ ողջ կյանքի ընթացքում միշտ քեզ հետ է: Ես հիվանդանոցում պառկած կարող ա ավել-պակաս բաներ եմ խոսել, ես դա չեմ հերքում, բայց ո՛չ Գագոն, ո՛չ Էդոն իմ վրա ձեռք չեն բարձրացրել»,- ասում է Հարությունովը:
Մանրամասները՝ տեսանյութում: