Ես միշտ սպասում եմ. Միհրան Պողոսյանը՝ ԱԱԾ-ի ուշադրության կենտրոնում լինելու մասին

Հանապետական պատգամավոր, գործարար Միհրան Պողոսյանը չի կարծում, որ ԱԱԾ-ն դիտավորյալ «ընկել է նախկին իշխանության անդամների հետևից»: Այս մասին լրագրողների հետ զրույցում ասաց Պողոսյանը:

«Եթե կան խնդիրներ, թող այդ խնդիրները պարզաբանվեն։ Պետք է ամեն ոք կարողանա իր արածի և չարածի համար պատասխան տալ։ Դա նորմալ պրոցես է։ Ես այստեղ խնդիր չեմ տեսնում»:

Հարցին՝ մտավախությո՞ւն չունի, որ ինքը ևս կհայտնվի ԱԱԾ ուշադրության կենտրոնում՝ Պողոսյանը պատասխանեց.

«Ես միշտ սպասում եմ բոլոր աշխատակիցներին։ Ես մի քանի անգամ ասել եմ՝ չի սխալվում այն մարդը, ով ընդհանրապես չի աշխատում։ Ես աշխատող մարդ եմ։ Ես կարող է սխալված լինեմ, բայց ինչ-որ չարաշահումներ, ապօրինություններ արած լինելու առումով խնդիր չեմ տեսնում»։

Միհրան Պողոսյանը խոսելով Երևանի քաղաքապետի առաջիկա ընտրությունների մասին՝ նշեց, որ Հանրապետականը որոշում կկայացնի՝ քաղաքապետի թեկնածու կունենա, թե՝ ոչ: Հարցին՝ արդյո՞ք հեղափոխությունից հետո ընտրողները նորից իրենց ձայները կտան ՀՀԿ-ին ՝ Պողոսյանը պատասխանեց.

«Ցանկացած փոփոխությունից հետո պետք է վերլուծել իրավիճակը։ Ցանկացած կուսակցություն պետք է գնահատի իր վիճակը և դրանից ելնելով իր թեկնածությունն առաջադրի կամ չառաջադրի։ Երբ արդեն ընտրությունների անհրաժեշտությունը լինի, այդ ժամանակի դրությամբ գնահատական կտրվի իրավիճակին և որոշում կկայացվի»։

Հարցին, հնարավո՞ր է, որ Տարոն Մարգարյանի հրաժարականի համար հիմք հանդիսացավ նաև վերջերս հրապարակված տեսանյութը նրա ունեցվածքի մասին՝ պատգամավորն ընդգծեց.

«Կարծում եմ՝ այս հարցը Տարոն Մարգարյանին պիտի տաք ու ես չեմ պատրաստվում տեսանյութերով մեկնաբանություններ անել»։