Կարևոր չի, թե որքան փող ունես, կամ ում լավ ախպերն ես, դու պատժվելու ես, ու էդտեղ համաներում չի լինելու. Ալեն Սիմոնյան
Այս նախագիծը վերաբերում է նրանց, որոնք այդ տուգանքները չեն կարողացել մուծել ու չեն էլ մուծելու. Դա մի մեծ բեռ է, որը մնացել է քաղաքացիների վրա: Այս մասին հուլիսի 11-ին, ԱԺ-ում ՃՈ տուգանքների համաներման վերաբերյալ օրինագծի քննարկման ժամանակ նշեց «Ելք» խմբակցության պատգամավոր Ալեն Սիմոնյանը:
Նրա խոսքով, երբ այդ բեռը չի հանվում, մարդու հաշիվների վրա կալանք է դրվում, մարդն անգամ ապառիկով հեռախոս չի կարողանում վերցնել. «Այս նախագծով այդ մարդկանց շանս է տրվում, որ կարողանան աշխատել: Ես միշտ վճարել եմ տուգանքները և ինձ նսեմացված չեմ զգում, որ այն մարդիկ, որոնք չեն կարողացել վճարել, ազատվել տուգանքներից»:
Ալեն Սիմոնյանն անդրադարձավ նաև անպատժելիության թեկային՝ նշելով. «Հիմա դեռ մնացել են մարդիկ, որոնք չեն հասկանում, որ արդեն կարևոր չի, թե որքան փող ունես, կամ ում ախպոր լավ ախպերն ես, դու պատժվելու ես: Ես վստահեցնում եմ ու այդ մարդկանց նույնպես դիմում եմ՝ դրա հետ կապված էս շենքում համաներում չի լինելու: կապ չունի թե դուք ով եք, ինչքան փող ունեք, կամ ում լավ ախպերն եք»: