Ռոջերսը ՀՀ-ում ասել է՝ ինչու պայմանագիր չի կնքել Մխիթարյանի հետ, երբ Լիվերպուլի մարզիչն էր
2013 թ.ՀՀ ֆուտբոլի հավաքականի կիսապաշտպան Հենրիխ Մխիթարյանը «Լիվերպուլ» չի տեղափոխվել, քանի որ ֆիզիկապես պատրաստ չի եղել Անգլիայի Պրեմիեր լիգայում խաղալուն: Այս մասին երեկ՝ հուլիսի 9-ին, Չեմպիոնների լիգայի 2018-19 մրցաշրջանի որակավորման 1-ին փուլի «Ալաշկերտ»-«Սելթիկ» խաղից առաջ ասել է շոտլանդական թիմի գլխավոր մարզիչ Բրենդան Ռոջերսը: Մասնագետը «Լիվերպուլը» գլխավորել է 2012-15 թթ.: 2013-ին, երբ Մխիթարյանը Դոնեցկի «Շախտյորի» խաղացող էր, շատ էին խոսակցությունները, որ նա հետաքրքրում է «մերսիսայդցիներին»: Արդյունքում նա տեղափոխվեց Դորտմունդի «Բորուսիա»:
«Այո՛, ես խոսել եմ Մխիթարյանի հետ, ու երկար խոսակցություն է եղել: Այդ ժամանակ նա ֆիզիկապես պատրաստ չէր Պրեմիեր լիգայում խաղալուն ու տեղափոխվեց Դորտմունդի «Բորուսիա»: Նա կատարյալ ֆուտբոլիստ է՝ արագ, տեխնիկապես հարուստ ու տաղանդավոր»,- ասել է Ռոջերսը:
Խոսելով «Ալաշկերտի» հետ կայանալիք այսօրվա հանդիպման մասին մասնագետը նշել է, որ իրենց բարդ խաղ է սպասվում: Պատճառներից մեկը շոգ եղանակն է, մյուսն էլ այն, որ հայկական թիմը մրցունակ է, ինչը երեւում է վերջին տարիների ընթացքում ազգային առաջնությունում գրանցած արդյունքներից:
«Նման մրցաշարերում միշտ պետք է հարգես մրցակցին: «Ալաշկերտը» վերջին 3 տարիների ընթացքում դարձել է երկրի չեմպիոն, եւ մենք գիտենք, որ լավ թիմ է: Կարծում եմ՝ եղանակը կարեւոր գործոն կլինի: Հիմա Մեծ Բրիտանիայում շոգ է, բայց մի կերպ նման չէ այստեղի շոգին: Երբեմն դա կարող է ազդել խաղի տեմպի վրա: Մենք սովոր չենք նման շոգի, ու բարդ է լինելու խաղալ նման եղանակային պայմաններում եւ այսպիսի բարդ մրցակցի դեմ»,- ասել է նա:
«Ալաշկերտ»-«Սելթիկ» հանդիպումն այսօր կայանալու է Վազգեն Սարգսյանի անվան «Հանրապետական» մարզադաշտում: Սկսվելու է 20:00-ին: Մուտքն ազատ է: Պատասխան խաղը մրցակցի հարկի տակ կկայանա հուլիսի 18-ին: