Հայկական կողմից խոսում էին 20 հազար հեկտարի մասին, Բաքվում էլ որոշել են խոսել 11 հազար հեկտարից. Իսագուլյան
Ադրբեջանը նախիջևանյան սահմանի մոտ դիրքային տեղաշարժ է կատարել, բայց դա ուժերի հարաբերակցության փոփոխության չի բերել։ Այս մասին այսօր՝ հուլիսի 9-ին լրագրողների հետ հանդիպմանը հայտարարեց Հայաստանում Արցախի ներկայացուցչության խորհրդատու Գառնիկ Իսագուլյանը:
«Որոշակի դիրքային տեղաշարժ կատարել է նաև հայկական կողմը, և շատ ավելի նպաստավոր է հիմա մեր դիրքը, քանի որ վերահսկում ենք այն դիրքերը, որտեղ որոշակի առաջընթաց է եղել նախիջևանյան ուժերի կողմից։ Ընդ որում՝ դրանք չեն եղել որևէ մեկի տարածքի հաշվին։ Այդ ուղղությամբ, բացի Ադրբեջանի ամպագոռգոռ հայտարարություններից, լուրջ գործողություններն անհնար են»,–շեշտեց նա։
Խոսելով ադրբեջանական կողմից 11 հազար հեկտարի առաջընթացի խոսակցությունների հիմքերի մասին, Իսագուլյանը նշեց. «Մինչև թավշյա հեղափոխությունը հայկական կողմից ինչ–որ մեկը խոսում էր 20 հազար հեկտարի մասին, որ մենք առաջ ենք գնացել։ Հիմա էլ ադրբեջանական կողմը որոշել է, որ խոսքը 11 հազար հեկտարի մասին է։ Սակայն դրանք իրականությանը չեն համապատասխանում։ Գուցե որոշ տեղերում իրենց դիրքերը լավացրել են, բայց հայկական կողմը համարժեք լավացրել է իր դիրքերը՝ առավել լավ վերահսկողություն սահմանելով ադրբեջանական դիրքերի վրա»։ Նա ընդգծեց՝ ադրբեջանական հռետորաբանությունը տարբերվում է հայկական հռետորաբանությունից. «Ադրբեջանի հռետորաբանությունը ե՛ւ ռազմատենչության առումով, ե՛ւ պատերազմի քարոզի, ե՛ւ Երևանը գրավելու առումով տարբերվում է հայկական հեռետորաբանությունից։ Մենք միշտ խոսում ենք խաղաղության դիրքերից, և, թվում է, թե հայկական կողմի այդ դիրքորոշումը թուլության նշան է, բայց դա այդպես չէ»։
Նա շեշտեց, որ հայկական կողմը, վերջապես, խոսում է կանխարգելիչ հնարավոր հարվածից. «Եթե տեսնենք, որ որևէ կուտակում սպառնալիք է մեր որևէ տարածքի համար։ Ես վստահ եմ, որ կգնանք կանխարգելիչ հարվածի»։