Նախագահի աշխատակազմի առաջարկած փոփոխություններն առնչություն ունեն ոչ թե Սահմանադրության, այլ որոշ օրենքների հետ. Արմեն Սարգսյան
Նախագահի աշխատակազմի առաջարկած փոփոխություններն ոչ թե առնչություն ունեն Սահմանադրության հետ, այլ որոշ օրենքների:
Այս մասին այսօր «Անվտանգություն և արտաքին քաղաքականություն. ՄԱՀՀԻ 3-րդ երիտասարդական ֆորումի» ժամանակ ասաց ՀՀ նախագահ Արմեն Սարգսյանը՝ պատասխանելով մասնակիցներից մեկի հարցին, թե մամուլում լուրեր են տարածվում սահմանադրական փոփոխությունների վերաբերյալ, ի՞նչ փոփոխություններ են դրանք:
Արմեն Սարգսյանն ասաց, որ Հանրապետության նախագահին կից կան իրավաբաններ, և որոշ օրենքներ փոփոխությունների կարիք ունեն:
«Ոչ թե Սահմանադրության մեջ, այլ կան օրենքներ, որտեղ փոփոխությունների կարիք կա: Օրինակ գրված է, որ նախագահը չի կարող հասարակական հիմունքներով երկուսից ավել խորհրդական ունենալ: Ինչո՞ւ 2, ոչ թե 12, եթե դա անվճար է, մանավանդ եթե ձեր նման երիտասարդներին նախագահը ցանկանում է հրավիրել իրենց խորհուրդը լսել, երկխոսել, իր խորհուրդները ձեզ հայտնել»,-ասաց Արմեն Սարգսյանը:
Նա ասաց, որ մի քանի իրավաբանների հետ իրենք առաջարկություններ են մշակել, բայց առաջարկությունները հիմնականում կապված չեն Սահմանադրության փոփոխության հետ, այլ կապված են այն օրենքների փոփոխության հետ, որտեղ փոքր փոփոխությունները հնարավորություն կտան ՀՀ նախագահի աշխատանքը և աշխատակազմի աշխատանքը դարձնել ավելի էֆեկտիվ. պարզ փոփոխություններ են:
Ինչ վերաբերում է այն հարցին, թե երբ իրեն հրավիրեցին առաջադրվել ՀՀ նախագահի թեկնածու, այդ ժամանակ նման մտադրություն կա՞ր, Արմեն Սարգսյանն ասաց, որ դա հեշտ առաջարկ չէր, որովհետև ինքը վաղուց որոշած է եղել այլ կերպ աշխատել, 300-ից ավել ուսանողների է կրթել Քեմբրիջում, Հարվարդում և այլն, բայց կյանքում մի ճյուղից մի ճյուղն անցնելիս, Աստծո դերը մեծ է:
«1997-ին ես վարչապետ էի և մտածում էի, թե մի 15 տարի ինչպես եմ աշխատելու, երիտասարդ վարչապետ էի, բայց Աստված ասաց՝ ոչ, գնա հիվանդանոց և պայքարի առողջությանդ համար, որը հեշտ չէր: Հիմա նորից Աստծո գործերը կան, 7 տարվա մանդատ, բայց չտվեց 7 օր, և վարչապետը հրաժարական տվեց: Ամեն ինչ գծած չէ, գծած էր Խորհրդային միությունում, որը դուք չեք հիշի»,-ասաց Արմեն Սարգսյանը:
Հարցին, թե ինչպիսի Հայաստան էր տեսնում, երբ ընտրվեց ՀՀ նախագահ, և ինչպիսի Հայաստան է տեսնում հիմա, Արմեն Սարգսյանն ասաց. «Ճիշտ նույն Հայաստանն եմ տեսել, բայց ինչպես ասացի՝ այդ Հայաստանը մենք 7 տարվա մեջ կկառուցեինք, պարզվեց կառուցեցինք 7 օրում»: