Մեր քաղաքականությունը այն չէ, որ բոլորը ազատվում են տուգանքներից, ով ոնց ուզի, կվարի մեքենան. Փաշինյան
Կառավարությունն այսօր՝ հուլիսի 4-ին միաձայն հավանություն տվեց «Մի շարք վարչական իրավախախտումների համար կիրառված տուգանքների համաներման մասին» ՀՀ օրինագծին, որով համաներում է կիրառվում մինչեւ 2017 թվականի դեկտեմբերի 31-ը ճանապարհային կանոնները խախտելու համար առաջացած տուգանքներ ունեցող քաղաքացիների նկատմամբ:
ՀՀ Արդարադատության նախարար Արտակ Զեյնալյանը նախքան նախագիծը ներկայացնելը վարչապետ Նիկոլ Փաշինյանին հարցրեց՝ արդյոք զեկուցի՞ հարցը, թե թողնի վերջում փակ քննարկմանը, քանի որ համաներման վերաբերյալ ակտը ֆինանսական հետևանքներ ունեցող է և ԱԺ պետաիրավական հանձնաժողովը այս հարցում փակ քննարկում է իրականացրել:
Նիկոլ Փաշինյանը հետաքրքրվեց, թե հանրությունը իրազեկելու հետ կապված ի՞նչ խնդիր ունեն, քանի որ այս նախագիծը վերաբերում է մինչև 2017 թվականի դեկտեմբերի 31-ի իրավախախտումներին. «Պրոբլեմը ո՞րն է, այս շաբաթ չի վճարելու տուգանքը, որ իմանա համաներում է լինելու՝ չվճարի: Մեր խնդիրն էլ նա է, որ մարդիկ իմանան, որ կարող են չվճարել: Մենք մեր խոստումը կատարում ենք»:
Արտակ Զեյնալյանը նշեց, որ այս օրինագծով առաջարկվում է մինչեւ 2017 թվականի դեկտեմբերի 31-ը ճանապարհային կանոնների խախտումներ թույլ տված անձանց ազատել տուգանքների վճարումից, իսկ զիջվող գումարի չափը 13,3 մլրդ դրամի է հասնում:
Նիկոլ Փաշինյանը հայտարարեց, որ խոսքը չի վերաբերում մինչև 2017 թվականի բոլոր վարչական խախտումներին. «Սիրելի՛ քաղաքացիներ, ձեր վարքագիծը փոխելուց առաջ սպասեք ԱԺ-ում ընդունվի նախագիծը և համոզվեք, որ այս օրենքը վերաբերում այն իրավախախտմանը, որը դուք կատարել եք, որից հետո ձեր վարքագիծը փոխեք: Իսկ ավելի լավ է, որ մենք մեր վարքագիծը փոխենք դեպի օրինաչափություն: Մենք արագաչափերի եւ տեսախցիկների հետ կապված խնդիր ունենք»:
Փաշինյանը նաեւ տեղեկացրեց, որ հիմա ոստիկանությունը, արդարադատության նախարարությունը եւ կառավարությունը համատեղ մշակում են օրենքի նախագիծ՝ վարչական իրավախախտումների մասին օրենքում որոշակի փոփոխությունների մասին, որոնք որոշակիորեն կթեթեւացնեն քաղաքացիների տուգանքային բեռը, բայց միաժամանակ էականորեն կբարձրացնեն երթեւեկության մասնակիցների կարգապահությունը.
«Մենք ասում ենք, որ գործող համակարգն ավելի շատ ֆիսկալ նշանակություն ունի, քան անվտանգության ապահովման: Մենք հիմա հստակ քաղաքականություն ենք որդեգրում, որ մեր նխատակը կարգապահությունը բարձրացնելն է լինելու: Ոստիկանությունը բավական լավ առաջարկներ է մշակել»:
ՀՀ ոստիկանապետ Վալերի Օսիպյանը տեղեկացրեց, որ տեսանկարահանող և լուսանկարահանող խախտումները կազմում են 150 հազար, իսկ ճանապարհապարեկային ոստիկանության կողմից՝ յոթ հարյուր հազար:
Նիկոլ Փաշինյանը կարևորեց այս որոշումը և նշեց, որ մարդկանց մի մասը, այսպես թե այնպես, չէր վճարելու այդ տուգանքները. «Բայց այդ չվճարումը բերելու էր հետեւանքների, դատական պրոցեսների: Սրանով զրկում ենք մարդկանց այդ գործընթացներից:
Այս մեր քաղաքականությունը տարբեր մեկնաբանությունների տեղիք է տալիս, ես ուզում եմ հստակ արձանագրել, որ մեր քաղաքականությունը այն չէ, որ բոլորը ազատվում են բոլոր տուգանքներից և ով ինչպես որտեղ ուզի, կվարի մեքենան: Քավ լիցի, դրա մասին խոսք լինել չի կարող: Խոսքը նրա մասին է, որ մինչ այս իրականացվող քաղաքականությունը ուներ ֆիսկալ նշանակություն և մարդկանց տուգանելու խնդիր էր դրված»:
Նշենք, որ ավելի վաղ արդարադատության նախարարությունը e-draft.am կայքում տեղադրել էր վարչական տուգանքների համաներման մասին օրենքի նախագիծը։