Ոստիկանության ներքին զորքերի` սահմանում ծառայություն իրականացնելու ծրագիրը սահմանի լարվածության հետ կապ չունի. ԳՇ պետ
Ոստիկանության ներքին զորքերի`սահմանում ծառայություն իրականացնելու վերաբերյալ քննարկումները եզրափակիչ փուլում են, դրա կիրառման համար անհրաժեշտ է կառավարության որոշման նախագիծ: Այս մասին Tert.am-ի հետ զրույցում հայտնեց ԶՈՒ Գլխավոր շտաբի պետ Արտակ Դավթյանը:
«Ոստիկանության ներքին զորքերը մտնում են այլ զորքերի մեջ, դրա կիրառումը նախատեսված է մեր պլաններով, այնտեղ ինչ-որ առանձնահատկություն չկա: Ծառայության հետ կապված որոշակի խնդիրներ այս պահին դրված են, ուսումնասիրում ենք, շատ հավանական է, որ մոտ ժամանակահատվածում դրա վերաբերյալ պաշտոնապես կհայտարարվի` ըստ կարգի»,-շեշտեց ԳՇ պետը:
Նա ընդգծեց, որ ոստիկանության, պաշտպանության նախարարության համատեղ որոշումն է, որ ներքին զորքերի ստորաբաժանումները հերթափոխով սահմանին ծառայություն իրականացնեն:
«Ներքին զորքերը պատրաստված են, եթե կառավարության կողմից վերջնական որոշում լինի, կանցնեն նաև մարտական հերթապահություն իրականացնելու համար լրացուցիչ կուրսեր»,-մանրամասնեց Արտակ Դավթյանը:
Նա հիշեցրեց, որ «Ներքին զորքերի մասին» օրենքով ներքին զորքերի խնդիրներից է նաև սահմանների պաշտպանությանը մասնակցելը:
«Իրենք Արցախում սահմանին եղել են ոչ միայն ապրիլյան պատերազմի ժամանակ, այլև, կարելի է ասել պարբերաբար. այդ մասին պարզապես չենք հայտարարել: Եթե հիշում եք, մենք ամեն տարի զորավարժություններ ենք իրականացնում` ընդգրկելով ոստիկանության զորքերից անձնակազմ` սկսած ամբողջ ծավալով, վերջացրած ստորաբաժանումներով:
Այն վիճակով, որ դուք ասում եք, որ այժմ նախատեսվում է, նախկինում չի եղել, բայց ինչ-որ պահի պիտի սկսվեր»,-ասաց նա: Անդրադառնալով հարցին՝ արդյոք այն, որ զորքերը ստորաբաժանումների հերթափոխով մշտապես լինելու են Արցախի սահմանում՝ նշանակում է, որ սահմանին իրավիճակը վտանգավոր, լարված է, և լրացուցիչ անձնակազմի խնդիր կա՝ Արտակ Դավթյանն ասաց, որ այս որոշումը սահմանի լարվածության հետ կապ չունի:
«Թաքցնելու ոչինչ չունենք»,-եզրափակեց նա:
Հիշեցնենք, որ «Հրապարակ» թերթը գրել էր, որ գործադիր իշխանությունը որոշել է ոստիկանության ներքին զորքերին ուղարկել սահման՝ ծառայելու: Շաբաթ օրը ՀՀ ոստիկանապետ Վալերի Օսիպյանը հանդիպել է ստորաբաժանման հետ և հայտնել, որ ՊՆ-ից առաջարկ է ստացել ու համաձայնել, թեև որոշումը Նիկոլ Փաշինյանինն է։ Օսիպյանն ասել է, որ օգոստոսի 15-ից 15-օրյա հերթափոխով կգործուղվեն Արցախ՝ սահմանները պաշտպանելու, այդ օրերի համար նաև հավելավճար կստանան։