Արցախի ԱԻՆ-ին անհատույց օգտագործման է տրվել հատուկ փրկարար մեքենա․ ՀՀ ԱԻՆ-ի գլխավորած պատվիրակությունն այցելել է Արցախ

Հունիսի 29-ին ՀՀ արտակարգ իրավիճակների նախարար Հրաչյա Ռոստոմյանի գլխավորած պատվիրակությունն այցելել է Արցախի Հանրապետություն։ Այս մասին տեղեկացնում է ԱԻՆ տեղեկատվության և հասարակայնության հետ կապերի վարչությունը:

Այցի շրջանակներում Արցախի Հանրապետության նախագահ Բակո Սահակյանն ընդունել է ՀՀ ԱԻ նախարարի գլխավորած պատվիրակությանը։ Հանդիպմանը, որին մասնակցում էր նաև Արցախի Հանրապետության արտակարգ իրավիճակների պետական ծառայության տնօրեն գնդապետ Կարեն Սարգսյանը, քննարկվել են երկու հայկական հանրապետությունների համապատասխան գերատեսչությունների միջև կապերի խորացմանն ու ընդլայնմանը վերաբերող մի շարք հարցեր: «Արցախի Հանրապետության նախագահի հետ հանդիպման ընթացքում մենք վերահաստատեցինք նախկինում արձանագրված բոլոր պայմանավորվածությունների կատարումը։ Համագործակցության հիմնական ուղղությունները շարունակական են լինելու հակակարկտային պաշտպանության, հիդրոմետ ծառայության արդիականացման, սեյսմիկ անվտանգության ապահովման և այլ բնագավառներում», - նշել է նախարար Հրաչյա Ռոստոմյանը։

Պաշտոնական այցի շրջանակներում նախարարի գլխավորած պատվիրակությունն այցելել է Արցախի Հանրապետության ԿԱ արտակարգ իրավիճակների պետական ծառայություն:

Պատվիրակության անդամները շրջայց են կատարել Ծառայության գլխավոր մասնաշենքում, հետևել մասնաշենքի հարակից տարածքում իրականացվող շինարարական աշխատանքների ընթացքին, ինչպես նաև այցելել Ճգնաժամային կառավարման կենտրոն, ծանոթացել ահազանգների վիճակագրությանը և բնույթին, փրկարարների արձագանքման մեթոդներին:

ՀՀ ԱԻ նախարար Հրաչյա Ռոստոմյանը պատրաստակամություն է հայտնել հնարավորինս աջակցել Արցախի գործընկերներին՝ մասնավորապես քաղպաշտպանության կադրերի վերապատրաստման, նյութատեխնիկական բազայի կատարելագործման և այլ ուղղություններով: Հայաստանի արտակարգ իրավիճակների նախարարության կողմից Ծառայությանն անհատույց օգտագործման է տրվել «Մերսեդես Բենց» մակնիշի հատուկ փրկարար մեքենա։ ՀՀ ԱԻՆ Ճգնաժամային կառավարման պետական ակադեմիայի ռեկտոր գեներալ-մայոր Հ. Մաթևոսյանը գործընկերներին հանձնել է մեթոդական ձեռնարկներ՝ նախատեսված նախադպրոցական և դպրոցական տարիքի երեխաների հետ աշխատող մասնագետների, տեղական ինքնակառավարման մարմինների աշխատակազմի, ինչպես նաև Ծառայության մասնագետների համար։ Շեշտվել է, որ ծառայության գործունեության ուղղություններից մեկը դա Արցախի Հանրապետության կառավարման մարմինների և կազմակերպությունների պատրաստումն է, ինչպես նաև բնակչության ուսուցումը։ Վերոնշյալ գրականությունը կարող է նպաստել այս գործընթացին։ ՀՀ ԱԻՆ-ը պատրաստակամություն է հայտնե« աջակցել Ծառայության անձնակազմի վերապատրաստման և բնակչության ուսուցման հարցում։

ՀՀ ԱԻՆ պատվիրակությունը ԱԻ նախարարի տեղակալ Արկադի Բալյանի ղեկավարությամբ շրջայց է կատարել ՀՀ ԱԻՆ սեյսմիկ պաշտպանության Արևելյան ծառայություն /"ՍՊԱրԾ" ՊՈԱԿ/։ Շրջայցի ընթացքում պատվիրակության անդամները ծանոթացել են աշխատակազմի կառուցվածքային ստորաբաժանումների աշխատանքին՝ մասնավորապես բնակչության հետ տարվող աշխատանքների բաժնում ծանոթացել բնակչության հետ տարվող աշխատանքների համար օգտագործվող մեթոդական բազային, և ձեռք է բերվել պայմանավորվածություն ՀՀ ԱԻՆ ՃԿՊԱ-ի մեթոդական բազան օգտագործելու հարցում, ինչպես նաև ՍՊԱրԾ երիտասարդ գիտնականներին հնարավորություն կընձեռվի տպագրվել Ճգնաժամային կառավարում և տեխնոլոգիաներ գիտական հոդվածների ժողովածուում։ Շրջայց է կատարվել նաև շինանյութերի փորձարկման և հիդրոերկրաքիմիական և անալիտիկ լաբորատորիաների, ինչպես նաև «Ստեփանակերտ» համալիր կայանի տարածքներում։ Ծանոթացել են վերոնշյալ լաբորատորիաների և կայանների ընթացիկ աշխատանքների առանձնահատկությունների և հիմնական խնդիրների հետ, ինչպես նաև քննարկվել են հետագա զարգացման մի շարք հարցեր։

Պաշտոնական այցի ավարտին ՀՀ ԱԻ նախարար Հրաչյա Ռոստոմյանը ևս մեկ անգամ հաստատել է երկու գերատեսչությունների միջև համագործակցության շարունակականությունը և հույս հայտնել, որ ձեռք բերված պայմանավորվածությունները մոտ ապագայում կյանքի կկոչվեն: